Fontainebleau காட்டு தீ: 18 மற்றும் 20 வயதுடைய சந்தேகநபர்கள் கைது!!

Fontainebleau காட்டுத் தீ தொடர்பாக இரண்டு பேர் கைது செய்யப்பட்டுள்ளனர். அவர்களில் 18 வயது இளைஞர் ஒருவர் கைகளில் கரி படிந்த நிலையில், அவரிடம் லைட்டரும் இருந்ததாக கூறப்படுகிறது. மேலும், காவல்துறைக்கு ஏற்கனவே அறிமுகமான 20 வயது நபரும் சந்தேகத்தின் பேரில் கைது செய்யப்பட்டுள்ளார். தீ விபத்துகள் திட்டமிட்டு ஏற்படுத்தப்பட்டிருக்கலாம் என்ற கோணத்தில் விசாரணை நடைபெற்று வருகிறது.

இந்த காட்டுத்தீ ஞாயிற்றுக்கிழமை முதல் தொடர்ந்து பரவி வருகிறது. இதுவரை சுமார் 2,050 ஹெக்டேர் காடு எரிந்துள்ளது. தீ தற்போது கட்டுப்பாட்டுக்குள் இருந்தாலும், முழுமையாக அணைக்கப்படவில்லை. இதை அணைக்கும் பணியில் 850 தீயணைப்பு வீரர்களும் நான்கு கனடேர் தண்ணீர் வீசும் விமானங்களும் ஈடுபட்டுள்ளன.

பிரான்ஸ் முழுவதும் காட்டுத்தீ தொடர்பாக நடவடிக்கைகள் தீவிரப்படுத்தப்பட்டுள்ளன. திங்கட்கிழமை மட்டும் திட்டமிட்டோ அல்லது கவனக்குறைவாலோ தீ ஏற்படுத்தியதாக 59 பேர் கைது செய்யப்பட்டனர். Seine-et-Marne பகுதியில் 14 மற்றும் 15 வயதுடைய இரண்டு சிறுவர்களும் சிறிய அளவிலான தீ விபத்து தொடர்பாக காவலில் வைக்கப்பட்டுள்ளனர்.

கடும் வெப்பம், வறண்ட காற்று மற்றும் பலத்த காற்றின் காரணமாக தீயை அணைப்பதில் சிரமம் ஏற்பட்டுள்ளது. இதுவரை சுமார் 1,000 பேர் பாதுகாப்பு கருதி வெளியேற்றப்பட்டுள்ளனர். அதிகாரிகள் இன்று தீயை முழுமையாக கட்டுப்பாட்டுக்குள் கொண்டு வர முடியும் என்ற நம்பிக்கையுடன் தொடர்ந்து மீட்பு மற்றும் தீயணைப்பு பணிகளை மேற்கொண்டு வருகின்றனர்.