CPF விதிகளில் மீண்டும் கடுமையான மாற்றம்: அரசின் புதிய திட்டம்!!

அரசு Compte Personnel de Formation (CPF) திட்டத்தில் மீண்டும் சீர்திருத்தங்களை மேற்கொள்ள திட்டமிட்டுள்ளது. தொழிலாளர் அமைச்சர் Jean-Pierre Farandouஇன் முன்மொழிவின்படி, இனி CPF மூலம் எந்தப் பயிற்சியையும் தொடங்குவதற்கு முன், அது பணியாளரின் நிறுவனமோ அல்லது வேலை தேடுபவர்களுக்கு France Travail அல்லது Apec அமைப்புகளோ அங்கீகரிக்க வேண்டும். இதன் நோக்கம், தேர்ந்தெடுக்கப்படும் பயிற்சி வேலைவாய்ப்பு சந்தையின் தேவைகளுக்கு ஏற்ப உள்ளதா என்பதை உறுதிப்படுத்துவதாகும்.

இந்தத் திட்டத்திற்கு தொழிற்சங்கங்கள் கடுமையாக எதிர்ப்பு தெரிவித்துள்ளன. குறிப்பாக CFDT மற்றும் CGT அமைப்புகள், இது ஊழியர்களின் சுயமாகப் பயிற்சி தேர்வு செய்யும் உரிமையைப் பறிக்கும் நடவடிக்கை என்றும், 2018-ஆம் ஆண்டின் CPF சட்டத்தின் அடிப்படை நோக்கத்திற்கு முரணானது என்றும் கூறுகின்றன.

மறுபுறம், முதலாளி அமைப்புகள் அரசின் திட்டத்திற்கு ஆதரவு அளிக்கின்றன. நிறுவனங்களே CPF-க்கு மிகப்பெரிய நிதி வழங்குபவர்கள் என்பதால், செலவுகளை கட்டுப்படுத்தவும், பயனற்ற பயிற்சிகளுக்கான நிதி வீணாவதைத் தடுக்கவும் இந்த மாற்றம் அவசியம் என அவர்கள் வலியுறுத்துகின்றனர்.

அரசு ஏற்கனவே CPF பயன்பாட்டில் பல கட்டுப்பாடுகளை அறிமுகப்படுத்தியுள்ளது. சில பயிற்சிகளுக்கான நிதி வரம்பு 1,500 யூரோக்களாக நிர்ணயிக்கப்பட்டுள்ளதுடன், 2025 முதல் பயிற்சியில் சேரும் ஒவ்வொருவரும் கட்டாயமாக 150 யூரோக்கள் தனிப்பட்ட பங்களிப்பைச் செலுத்த வேண்டும். இந்த நடவடிக்கைகள் மூலம் அரசின் செலவுகளை குறைப்பதே முக்கிய நோக்கமாகும்.