பெற்றோர் தெரிந்துகொள்ள வேண்டிய முக்கிய தகவல்கள்!

குழந்தைகளின் மனநிலையையும் தன்னம்பிக்கையையும் பாதிக்கக்கூடிய வார்த்தைகளை பெற்றோர் ஒருபோதும் பயன்படுத்தக் கூடாது. சிறு வயதிலேயே குழந்தைகள் தங்களைச் சுற்றி நடக்கும் அனைத்தையும் கவனித்து, பெரியவர்களின் பேச்சு மற்றும் நடத்தையை பின்பற்றத் தொடங்குகிறார்கள். எனவே, பெற்றோர் பேசும் ஒவ்வொரு வார்த்தையும் அவர்களின் குணநலன் மற்றும் சிந்தனை வளர்ச்சியில் முக்கிய பங்கு வகிக்கிறது.

வீட்டில் எதிர்மறை, அவமதிப்பு அல்லது ஆபாசமான சொற்கள் பயன்படுத்தப்படும்போது, அவை குழந்தைகளின் மனதில் ஆழமான தாக்கத்தை ஏற்படுத்தும். அதற்குப் பதிலாக, என்ன செய்யக்கூடாது என்று கூறுவதைவிட, என்ன செய்ய வேண்டும் என்பதை அமைதியாகவும் நேர்மறையாகவும் விளக்குவது சிறந்த அணுகுமுறையாகும்.

எதிர்மறை வார்த்தைகளை தவிர்ப்பது ஏன் அவசியம்?உடனே நிறுத்து, உன்னால் எதுவும் சரியாக செய்ய முடியாது, இப்படி உட்காராதே, சாப்பிட்டால்தான் இனிப்பு கிடைக்கும் போன்ற கட்டளையிடும் அல்லது குறை கூறும் வார்த்தைகள் குழந்தைகளிடம் பயம், கோபம் மற்றும் தாழ்வு மனப்பான்மையை உருவாக்கக்கூடும். தொடர்ந்து இவ்வாறான வார்த்தைகளை கேட்கும் குழந்தைகள் தங்களைப் பற்றிய எதிர்மறை எண்ணங்களை வளர்த்துக்கொள்ளும் அபாயம் உள்ளது.

நேர்மறையாக பேசும் பழக்கத்தை உருவாக்குங்கள்அதே கருத்தை மென்மையாகவும் ஊக்கமளிக்கும் விதமாகவும் கூறினால், குழந்தைகள் அதை எளிதாக ஏற்றுக்கொள்வார்கள். உதாரணமாக, இன்றைக்கு கேம் விளையாடியது போதும், வேறு ஒரு விளையாட்டு விளையாடலாமா?, நன்றாக உட்கார்ந்து கொள்வோமா?, இதைத் தொடாமல் இருந்தால் நல்லது, முதலில் சாப்பிடுங்கள், பிறகு இனிப்பு சாப்பிடலாம் போன்ற வார்த்தைகள் குழந்தைகளுக்கு அழுத்தமாக இல்லாமல் புரிதலை ஏற்படுத்தும்.

சாபம் மற்றும் ஆபாசமான சொற்களை முற்றிலும் தவிர்க்க வேண்டும்குழந்தைகளை திட்டுவது, சாபமிடுவது அல்லது இழிவுபடுத்தும் வார்த்தைகளை பயன்படுத்துவது அவர்களின் மனநலனை கடுமையாக பாதிக்கலாம். இதனால் தன்னம்பிக்கை குறைதல், மன அழுத்தம் மற்றும் தவறான பழக்கவழக்கங்களை நோக்கி செல்லும் அபாயமும் ஏற்படலாம். எனவே, குழந்தைகளிடம் எப்போதும் அன்புடனும் பொறுமையுடனும் பேச வேண்டும். அவர்கள் செய்யும் நல்ல செயல்களை பாராட்டி, தோல்வி அடைந்தால் கண்டிப்பதற்குப் பதிலாக ஊக்கப்படுத்த வேண்டும்.

நல்ல வார்த்தைகள் நல்ல மனிதர்களை உருவாக்கும்பெற்றோர் பயன்படுத்தும் இனிமையான வார்த்தைகள் குழந்தைகளின் குணநலனில் நல்ல மாற்றங்களை ஏற்படுத்தும். நேர்மை, அன்பு, மரியாதை, பிறரிடம் கருணை போன்ற நல்ல பண்புகள் அவர்களிடம் இயல்பாக வளரத் தொடங்கும். நேர்மறையான சூழலில் வளரும் குழந்தைகள் தன்னம்பிக்கையுடனும் பொறுப்புணர்வுடனும் வளர்வதுடன், நல்ல நண்பர்கள் வட்டாரத்தையும் உருவாக்குவார்கள். பெற்றோரின் அன்பான பேச்சும் ஊக்கமும், குழந்தைகளின் எதிர்காலத்தை சிறப்பாக வடிவமைக்கும் முக்கியமான அடித்தளமாக அமையும்.