சட்டவிரோத அழகுக்கான சிகிச்சைகள்: 5,000 மருத்துவர்களின் அவசர எச்சரிக்கை!!

சட்டவிரோத அழகியல் ஊசி சிகிச்சைகளை உடனடியாக நிறுத்த வேண்டிய அவசியம் ஏற்பட்டுள்ளதாக தேசிய பிளாஸ்டிக், மறுசீரமைப்பு மற்றும் அழகியல் அறுவைச் சிகிச்சை சங்கம் (SNCPRE) எச்சரித்துள்ளது. இந்த கோரிக்கையை ஆதரித்து சுமார் 5,000 மருத்துவர்கள் மற்றும் அழகியல் மருத்துவ நிபுணர்கள் அறிக்கை ஒன்றில் கையெழுத்திட்டுள்ளனர்.

சட்டவிரோதமாக மேற்கொள்ளப்பட்ட அழகியல் ஊசி சிகிச்சைகளால் இரண்டு இளம் பெண்கள் உயிரிழந்ததைத் தொடர்ந்து, இந்த குற்றங்களுக்கு விதிக்கப்படும் தண்டனைகளை மேலும் கடுமையாக்க வேண்டும் என்று மருத்துவர்கள் வலியுறுத்தியுள்ளனர். மருத்துவத் தகுதி இல்லாதவர்கள் இத்தகைய சிகிச்சைகளை மேற்கொள்வது அதிகரித்து வருவதாகவும் அவர்கள் கவலை தெரிவித்துள்ளனர்.

மேலும், இத்தகைய சட்டவிரோத சேவைகள் சமூக ஊடகங்கள் மூலம் பரவலாக விளம்பரப்படுத்தப்படுவதால், பொதுமக்களின் உயிருக்கு ஆபத்து அதிகரித்து வருவதாக சங்கம் தெரிவித்துள்ளது. இதைத் தடுக்க சமூக ஊடக நிறுவனங்கள் போதுமான நடவடிக்கை எடுக்கவில்லை என்றும் குற்றம்சாட்டப்பட்டுள்ளது.

2022ஆம் ஆண்டிலேயே இந்த அபாயம் குறித்து எச்சரிக்கை விடுக்கப்பட்டிருந்தாலும், சுகாதார மற்றும் நீதித்துறை அதிகாரிகள் போதுமான கடுமையுடன் செயல்படவில்லை என SNCPRE தெரிவித்துள்ளது. சட்டவிரோத கணக்குகளை மூடவும், குற்றவாளிகளுக்கு கடுமையான தண்டனை வழங்கவும் அரசு உடனடி நடவடிக்கை எடுக்க வேண்டும் என்று சங்கம் வலியுறுத்தியுள்ளது.