அவுஸ்திரேலியக் குடியுரிமை வழங்கப்பட்டதில் பெருமிதம் - இரண்டு முன்னாள் கால்பந்து வீராங்கனைகள்

அவுஸ்திரேலியக் குடியுரிமை வழங்கப்பட்டதில் பெருமிதம் கொள்வதாக ஈரானைச் சேர்ந்த இரண்டு முன்னாள் கால்பந்து வீராங்கனைகள்.

போட்டிக்கு முன்னதாகத் தேசிய கீதம் பாட மறுத்ததற்காகத் தங்கள் சொந்த நாட்டில் துரோகிகள் என்று முத்திரை குத்தப்பட்ட நிலையில், அவுஸ்திரேலியக் குடியுரிமை பெற்றதில் பெருமை கொள்வதாக ஈரானைச் சேர்ந்த இரண்டு முன்னாள் கால்பந்து வீராங்கனைகள் தெரிவித்துள்ளனர்.

மார்ச் மாதத்தில் நடைபெற்ற மகளிர் ஆசியக் கிண்ணம் போட்டியின்போது நிகழ்ந்த பரபரப்பான போராட்டத்தைத் தொடர்ந்து, அவுஸ்திரேலியாவின் பாதுகாப்பைக் கோரிய ஈரானியக் குழுவின் ஏழு உறுப்பினர்களில் ஃபதேமே பசந்திதே மற்றும் அத்தேஃபே ரமேசனிசாதே ஆகியோரும் அடங்குவர்.

அவுஸ்திரேலிய அரசாங்கத்திடம் பாதுகாப்பு கோரிக்கைகள் முன்வைத்தது ஈரானின் தலைவர்களுக்குச் சங்கடத்தை ஏற்படுத்தியது. அதே வேளை அமெரிக்க ஜனாதிபதி டொனால்ட் ட்ரம்ப் அந்த வீரர்களின் துணிச்சலைப் பாராட்டிய நிலையில், அவர்களில் ஐவர் பின்னர் தங்கள் முடிவை மாற்றிக்கொண்டு நாடு திரும்பினர்.

பசந்திதே மற்றும் ரமேசனிசாதே ஆகியோர் அவுஸ்திரேலியாவில் தங்கிவிட்டனர்; உள்விவகார அமைச்சர் டோனி பர்க் முன்னிலையில் புதன்கிழமை நடைபெற்ற விழாவில் அவர்களுக்கு அவுஸ்திரேலியக் குடியுரிமை வழங்கப்பட்டது.

தஞ்சம் கோரி ஒரு வாரம் கழித்து, அந்த ஜோடி அவுஸ்திரேலிய கிளப்பான பிரிஸ்பேன் ரோருடன் சிரித்தபடி பயிற்சி செய்யும் புகைப்படம் வெளியானது; அக்கழகம் புதன்கிழமை அன்று அந்த ஜோடிக்கு வாழ்த்து தெரிவித்தது.

இதனிடையே, ஈரானுக்குத் திரும்பியதிலிருந்து, அணியின் மற்ற உறுப்பினர்களின் நிலை என்ன என்பது குறித்த தகவல் ஏதும் வெளியாகவில்லை.

ஆனால், தேசிய அணியின் விளையாட்டு உடைகளை அணிந்தும், தலைமுடியை மறைத்தபடியும், துருக்கியிலிருந்து பேருந்து மூலம் அவர்கள் தங்கள் தாய்நாட்டிற்குள் நுழைவதை AFP செய்தி நிறுவனம் பதிவு செய்திருந்தது.