நோய்விடுப்பு கட்டுப்பாடுகளை அதிகரிக்கும் அரசு!!

கடந்த ஒரு மாதமாக, அரசு நோய்விடுப்புச் (arrêts maladie) செலவுகளை குறைக்கும் புதிய திட்டத்தை ஆய்வு செய்து வருகிறது. மார்ச் தொடக்கத்திலிருந்து பிரதமர் செபாஸ்தியன் லெகோர்னு, சுகாதாரம், பொது நிதி, தொழில் மற்றும் தொழில்துறை அமைச்சர்களுடன் பலமுறை ஆலோசனை நடத்தி, இந்த செலவுகளை கட்டுப்படுத்த வழிகளை ஆராய்ந்துள்ளார். ஆனால் தொழிற்சங்கங்களோ, முதலாளிகளோ, நோயாளி அமைப்புகளோ இதில் சேர்க்கப்படவில்லை.

அரசுகள் மாறினாலும், நோய்விடுப்பை கட்டுப்படுத்த முயற்சிகள் புதிதல்ல. சில யோசனைகள் நடைமுறைக்கு வராதபோதிலும், கடந்த இரண்டு ஆண்டுகளில் பல கட்டுப்பாடுகள் அமல்படுத்தப்பட்டுள்ளன.

தொலைமருத்துவ ஆலோசனைகளில் (Téléconsultation) வழங்கப்படும் நோய்விடுப்பு

2024 முதல், தொலைமருத்துவ ஆலோசனையில் வழங்கப்படும் நோய்விடுப்பு மூன்று நாட்களுக்கு மட்டுப்படுத்தப்பட்டது. அதற்கு மேல் இருந்தால், அது குடும்ப மருத்துவர் அல்லது பதிவு செய்யப்பட்ட sage-femme வழங்கியிருந்தால்தான் செலுத்தப்படும்.

வேலை வழங்குநர் மூலம் கண்காணிப்பு

2024 ஜூலை முதல், நிறுவனங்கள் மருத்துவரை நியமித்து, வீட்டிலேயே ஊழியர்களைச் சரிபார்க்க அனுமதிக்கப்பட்டுள்ளது. ஊழியர் சரியான காரணம் காட்டவில்லை என்றால், கூடுதல் கொடுப்பனவுகள் நிறுத்தப்படலாம்.

ஆனால், அரசு முன்மொழிந்த சில கடுமையான நடவடிக்கைகள் அரசியலமைப்பு கவுன்சிலால் நிராகரிக்கப்பட்டன.

வீடியோ (visioconférence) மூலம் மருத்துவ கண்காணிப்பு

2025 டிசம்பர் முதல், மருத்துவ ஆலோசகர்கள் வீடியோ மூலம் நோய்விடுப்பைச் சரிபார்க்கலாம். இது முன்பு நேருக்கு நேர் மட்டுமே நடந்தது. இந்த முறை மோசடிகளைத் தடுக்கவும், நோயாளிகளின் பயணத்தை குறைக்கவும் உதவும் என அரசு கூறுகிறது.

கொடுப்பனவின் உச்சவரம்பு குறைப்பு

2025 ஏப்ரல் 1 முதல், கொடுப்பனவின் உச்சவரம்பு 1.8 SMIC இல் இருந்து 1.4 SMIC ஆக குறைக்கப்பட்டது. அதாவது, ஒரு மாத நோய்விடுப்புக்கான அதிகபட்ச தொகை 2,552.25 யூரோக்கள் மட்டுமே.

நோய்விடுப்பு காலம் குறைப்பு

2026க்கான புதிய சட்டப்படி, நோய்விடுப்பு காலம் 1 மாதமாகவும், அதன் நீட்டிப்பு 2 மாதமாகவும் வரையறுக்கப்பட்டுள்ளது. இது 2026 செப்டம்பர் 1 முதல் அமலுக்கு வரும்.

அடுத்தடுத்த நடவடிக்கைகள்

அரசு இன்னும் பல திட்டங்களை பரிசீலித்து வருகிறது:

• நீண்டகால நோய்விடுப்புகளுக்கு கூடுதல் கட்டுப்பாடு
• பகுதி நேர சிகிச்சை (mi-temps thérapeutique) அதிகப்படுத்தல்
• குறுகிய கால நோய்விடுப்புகளுக்கும் கட்டுப்பாடுகள்
• காத்திருப்பு நாட்களை (carence) அதிகரிக்கும் சாத்தியம்
• “SOS IJ” போன்ற சேவைகளை வலுப்படுத்தல்