CSK வரலாற்று வெற்றி - பல சாதனைகளை படைத்த சஞ்சு சாம்சன்

MI அணிக்கு எதிராக CSK பாரிய வெற்றியடைந்த போட்டியில், சஞ்சு சாம்சன் பல்வேறு சாதனைகளை முறியடித்துள்ளார்.

மும்பை இந்தியன்ஸ் மற்றும் சென்னை சூப்பர் கிங்ஸ் அணிகளுக்கு இடையேயான போட்டி, நேற்று மும்பை வான்கடே மைதானத்தில் நடைபெற்றது.

நாணய சுழற்சியில் வென்ற மும்பை இந்தியன்ஸ் அணி முதலில் பந்துவீச்சை தேர்வு செய்தது.

இதன்படி, முதலில் துடுப்பாட்டம் ஆடிய சென்னை சூப்பர் கிங்ஸ், 20 ஓவர்கள் முடிவில் 6 விக்கெட் இழப்பிற்கு 207 ஓட்டங்கள் குவித்தது.

தொடர்ந்து, 207 ஓட்டங்கள் என்ற வெற்றி இலக்குடன் களமிறங்கிய மும்பை இந்தியன்ஸ், 19 ஓவர்கள் முடிவில் 104 ஓட்டங்கள் குவித்து அனைத்து விக்கெட்களையும் இழந்தது.  

இதன் மூலம், சென்னை சூப்பர் கிங்ஸ் 103 ஓட்டங்கள் வித்தியாசத்தில் வெற்றி பெற்றது.

இதன் மூலம், MI அணிக்கு எதிராக 100 ஓட்டங்களுக்கு அதிகமான வித்தியாசத்தில் வெற்றி பெற்ற முதல் அணி என்ற சாதனையை CSK படைத்தது.

மும்பை இந்தியன்ஸ் அதன் சொந்த மைதானத்தில், அதிகபட்சமாக RCB அணியிடம் 39 ஓட்டங்கள் வித்தியாசத்தில் தோற்றதே அதிகமாக இருந்தது. தற்போது 103 ஓட்டங்கள் வித்தியாசத்தில் தோல்வியடைந்து மோசமான சாதனையை முறியடித்துள்ளது.

54 பந்துகளில் 10 பவுண்டரி, 6 சிக்ஸர் உட்பட 101 ஓட்டங்கள் எடுத்த CSK வீரர் சஞ்சு சாம்சன் பல்வேறு சாதனைகளை படைத்துள்ளார்.

இதன் மூலம், மும்பை இந்தியன்ஸ் அணிக்கு எதிராக சதம் விளாசிய முதல் CSK வீரர் என்ற சாதனையை படைத்துள்ளார்.

முன்னதாக, மும்பைக்கு எதிராக ருதுராஜ் கெய்க்வாட் 88 ஓட்டங்கள் எடுத்ததே அதிகபட்சமாக இருந்தது.

மேலும், CSK அணிக்கு ஒரு ஐபிஎல் தொடரில் 2 சதம் விளாசிய முதல் இந்திய வீரர் என்ற பெருமையை பெற்றுள்ளார்.

இத்துடன் டி20 போட்டிகளில், இந்திய விக்கெட் கீப்பர் பேட்ஸ்மேனாக தனது 6வது சதத்தை பதிவு செய்த சஞ்சு சாம்சன் அதிக சதங்கள் இந்திய விக்கெட் கீப்பர் பேட்ஸ்மேன் என்ற சாதனையை முறியடித்தார். 5 சதங்களுடன் இஷான் கிஷான் அடுத்த இடத்தில் உள்ளார்.  

மொத்தமாக அதிக T20 சதம் அடித்த இந்திய வீரர்களின் பட்டியலில் 8 சதங்களுடன் ரோஹித் சர்மாவின் சாதனையை சமன் செய்துள்ளார். விராட் கோலி மற்றும் அபிஷேக் சர்மா 9 சதங்களுடன், முதலிடத்தில் உள்ளனர்.