2027 ஜனாதிபதி தேர்தல்: Jean-Luc Mélenchon வேட்பாளராக அதிகாரப்பூர்வ அறிவிப்பு !!

இடதுசாரி அரசியல் இயக்கமான La France insoumise (LFI) கட்சியின் தலைவரான Jean- Luc Mélenchon , 2027ஆம் ஆண்டு நடைபெறவுள்ள ஜனாதிபதி தேர்தலில் தாம் போட்டியிடுவதாக அதிகாரப்பூர்வமாக அறிவித்துள்ளார். ஞாயிற்றுக்கிழமை இரவு தொலைக்காட்சி நேர்காணலில் கலந்து கொண்ட அவர், “ஆம், நான் வேட்பாளர்” எனத் தெளிவாக தெரிவித்துள்ளார். இதேவேளை, LFI கட்சியின் தெரிவு செய்யப்பட்ட பிரதிநிதிகள் பரிசில் ஒரே வேட்பாளராக அவரை ஆதரிப்பதற்கான முடிவை எடுத்துள்ளனர்.

நாட்டின் எதிர்கால சூழ்நிலைகளை முன்னிட்டு இந்த முடிவு எடுக்கப்பட்டுள்ளதாக மெலன்சோன் குறிப்பிட்டுள்ளார். உலகளாவிய போர் அபாயம் மற்றும் காலநிலை மாற்றம் போன்ற முக்கிய சவால்கள் உருவாகி வரும் நிலையில், அனுபவமிக்க தலைமை அவசியம் என அவர் வலியுறுத்தினார். ஜனாதிபதி தேர்தலில் தனது முக்கிய எதிரியாக வலதுசாரி கட்சியான Rassemblement national இருக்கும் என்றும், அவர்கள் வெற்றி பெறுவார்கள் என்ற கருத்தை தாம் ஏற்கவில்லை என்றும் தெரிவித்தார்.

இந்த வேட்புமனு அதிகாரப்பூர்வமாக நிறைவேற 150,000 பொதுமக்கள் ஆதரவு கையெழுத்துகள் தேவைப்படும் நிலையில், அது எளிதில் கிடைக்கும் என எதிர்பார்க்கப்படுகிறது. 74 வயதான மெலன்சோன், 2012, 2017 மற்றும் 2022 தேர்தல்களில் முதல் சுற்றிலேயே தோல்வியடைந்திருந்தார். குறிப்பாக 2022 தேர்தலில் அவர் இரண்டாம் சுற்றுக்குத் தகுதி பெறுவதில் சுமார் 420,000 வாக்குகள் குறைவாக இருந்தது குறிப்பிடத்தக்கது.

இந்நிலையில், இடதுசாரி அரசியல் வட்டாரங்களில் நிலவும் குழப்பத்தை பயன்படுத்திக் கொண்டு ஆதரவை அதிகரிக்க LFI திட்டமிட்டு செயல்படுகிறது. கருத்துக்கணிப்புகள் அவருக்கு எதிராக இருந்தாலும், வாக்காளர்களை அதிகம் ஈர்க்கும் திறன் கொண்ட தலைவராக மெலன்சோன் பார்க்கப்படுகிறார். அவரின் அரசியல் அனுபவம் மற்றும் விவாத திறமை அவரை கட்சியின் முக்கியமான முகமாக வைத்திருக்கிறது.