100% பிரான்சில் தயாரிக்கப்படும் பரசிட்டமோல்!!

2027ஆம் ஆண்டின் தொடக்கத்தில், 100% பிரான்சிலேயே தயாரிக்கப்படும் முதல் பரசிட்டமோல் மருந்துகள் சந்தைக்கு வரவுள்ளதாக தகவல் வெளியாகியுள்ளது. இந்த திட்டம் மருந்து நிறுவனங்களான Upsa மற்றும் Seqens ஆகியவற்றின் கூட்டாண்மையின் மூலம் செயல்படுத்தப்படுகிறது.

2025 ஆம் ஆண்டு “Origine France Garantie” சான்றிதழைப் பெற்ற முதல் மருந்து நிறுவனம் Upsa ஆகும். இருப்பினும், மருந்துகளின் பொதிகளில் “பிரான்சில் தயாரிக்கப்பட்டது” என்ற குறிப்பைச் சேர்க்க பிரான்ஸ் தேசிய மருந்து பாதுகாப்பு முகமை (ANSM) அனுமதி வழங்கவில்லை.

தற்போது Upsa நிறுவனம் பிரான்சில் Dafalgan என்ற பரசிட்டமோலை உற்பத்தி செய்கிறது. ஆனால் அதன் முக்கிய செயற்பாட்டு மூலப்பொருட்களில் 85% அமெரிக்காவிலிருந்து இறக்குமதி செய்யப்படுகின்றன.

கொரோனா பெருந்தொற்றுக்குப் பிறகு, மருந்துத் துறையில் பிரான்சின் தன்னிறைவை அதிகரிக்கும் நோக்கில் இந்த முயற்சி தொடங்கப்பட்டது. தற்போது ஐரோப்பாவில் விற்கப்படும் மருந்துகளில் சுமார் 80% மருந்துகள் இந்தியா அல்லது சீனாவிலிருந்து இறக்குமதி செய்யப்படும் மூலப்பொருட்களை சார்ந்துள்ளன.