அலி காமெனெயின் மரணத்திற்கு காரணமான பிரபலங்களின் பட்டியலில் இம்மானுவேல் மக்ரோன்!!

ஈரானின் Hamshahri நாளிதழ், ஆயத்துல்லா அலி காமெனெயின் மரணத்திற்கு பொறுப்பேற்க வேண்டும் என்று கூறப்படும் 13 முக்கிய நபர்களின் பட்டியலை இன்று வெளியிட்டுள்ளது. அந்த பட்டியலில் அமெரிக்க ஜனாதிபதி டொனால்ட் டிரம்ப், இஸ்ரேல் பிரதமர் பெஞ்சமின் நெதன்யாகு, இத்தாலி பிரதமர் யோர்ஜியா மெலோனி ஆகியோருடன், பிரான்ஸ் ஜனாதிபதி இம்மானுவேல் மக்ரோனின் பெயரும் இடம்பெற்றுள்ளது.

இப்பட்டியல் குறித்து ஈரான் அரசு அதிகாரப்பூர்வமாக எந்தக் கருத்தையும் வெளியிடவில்லை. இருப்பினும், உச்ச தலைவர் அலி காமெனெயின் மகனும் தற்போதைய உச்ச தலைவருமான மொஜ்தபா காமெனெய், தனது தந்தையின் இறுதிச்சடங்குகளுக்குப் பிறகு வெளியிட்டதாகக் கூறப்படும் எழுத்து அறிக்கையில், 

“இந்தப் பழிவாங்குதல் எங்கள் நாட்டின் விருப்பமாகும்; அது தவிர்க்க முடியாமல் நிறைவேற்றப்படும். பட்டியலில் இடம்பெற்றுள்ள இந்தக் குற்றவாளிகள், தங்களது படுக்கையிலேயே அமைதியாக இறக்க வேண்டும் என்ற ஆசையை நிறைவேற்ற முடியாமல் கல்லறைக்குச் செல்வார்கள்.” என கூறப்பட்டுள்ளது.

அலி காமெனெய், பிப்ரவரி 28 அன்று ஈரானில் நடைபெற்ற போரின் முதல் நாளில் இஸ்ரேல்–அமெரிக்கா இணைந்து நடத்தியதாகக் கூறப்படும் தாக்குதலில் உயிரிழந்ததாக இந்தச் செய்தி குறிப்பிடுகிறது. 

சனிக்கிழமை இரவு ஹம்ஷஹ்ரி நாளிதழ் வெளியிட்ட தகவல் வரைபடத்தில், மொஜ்தபா காமெனெயின் மேற்கண்ட கருத்துகள் இடம்பெற்றிருந்தன. ஆனால், அந்த வரைபடம் ஞாயிற்றுக்கிழமை வெளியான அச்சுப் பதிப்பில் இடம்பெறவில்லை.

அந்த தகவல் வரைபடத்தில் 13 பேரின் புகைப்படங்கள் இடம்பெற்றிருந்தன. மொஜ்தபா காமெனெய் குறிப்பிட்டதாகக் கூறப்படும் "பட்டியல்" தொடர்பாக அவை வெளியிடப்பட்டதாகத் தோன்றினாலும், அவரது அறிக்கையில் எந்த நபரின் பெயரும் நேரடியாக குறிப்பிடப்படவில்லை.

அந்த வரைபடத்தில் டொனால்ட் டிரம்ப் மற்றும் பெஞ்சமின் நெதன்யாகுவின் படங்களின் மீது குறிவைக்கும் சின்னம் (target) இடம் பெற்றிருந்தது.

மேலும், அமெரிக்க வெளியுறவுத்துறை செயலாளர் மார்கோ ரூபியோ, பிரான்ஸ் ஜனாதிபதி இம்மானுவேல் மக்ரோன், இத்தாலி பிரதமர் யோர்ஜியா மெலோனி, ஜெர்மனி சான்சலர் ஃப்ரீட்ரிக் மெர்ஸ், மற்றும் பிரிட்டனின் பதவி விலகிய பிரதமர் கியர் ஸ்டார்மர் ஆகியோரின் பெயர்களும் அந்தப் பட்டியலில் இடம்பெற்றிருந்தன.

போரின்போது, ஐரோப்பிய நாடுகள் தங்கள் நாட்டின் மீது நடத்தப்பட்ட தாக்குதல்களை கண்டிக்கவில்லை என்றும், சில நாடுகள் அமெரிக்க இராணுவ விமானங்கள் தங்களது வான்வெளியைப் பயன்படுத்த அனுமதித்ததன் மூலம் அந்த நடவடிக்கைகளில் மறைமுகமாக பங்கேற்றன என்றும் ஈரான் குற்றம் சாட்டியுள்ளது.