இல்-து-பிரான்சிலும் மின் தடை!! 50,000 வீடுகள் மின்சாரத்தடை!

பிரான்சின் மின்சார விநியோக வலையமைப்பை நிர்வகிக்கும் Enedis, நிலத்தடியில் உள்ள மின்கடத்திகள் அதி உச்ச வெப்ப அலை காரணமாக கடுமையாக சூடுபிடித்து, உயர் அளவிலான கோளாறுகள் ஏற்படும் அபாயம் உருவாகியுள்ளதால், தனது FIRE (Force d’intervention rapide électricité) எனப்படும் விரைவு தலையீட்டு அணியை செயல்படுத்தியுள்ளது. இதன் விளைவாக, வியாழக்கிழமை இரவு 50,000 வீடுகள் மின்சாரம் இன்றி இருந்தன.

Enedis வெளியிட்ட 19.00 மணிக்கான நிலை அறிக்கையின்படி,

“மோசமான வெப்பநிலை காரணமாக ஏற்பட்ட கோளாறுகளால் 50,000 வாடிக்கையாளர்கள் மின்சாரம் இன்றி இருந்தனர். இதில் Yvelines பகுதியில் 33,000 வீடுகள், Hauts‑de‑Seine பகுதியில் 7,400 வீடுகள், Gironde பகுதியில் 5,700வீடுகள்" என தெரிவிக்கப்பட்டது.

Enedis‑ன் விளக்கத்தின்படி, பெரும்பாலான கோளாறுகள் “சில மணி நேரங்களுக்குள் சரிசெய்யப்படலாம். குறிப்பாக தொலைநிலை செயல்பாடுகள் மூலம்”. ஆனால் சில சிக்கலான பணிகள், தளத்தில் உள்ள தொழில்நுட்பக் குழுக்களின் நீண்ட நேர பணி தேவைப்படுத்துகின்றன. தற்போது 1,000‑க்கும் மேற்பட்ட Enedis தொழில்நுட்ப நிபுணர்கள் மற்றும் கூட்டாளர் நிறுவனங்களின் பணியாளர்கள் செயல்பாட்டில் உள்ளனர்.

Yvelines பகுதியில் ஏற்பட்ட மின்தடை “ஒரு சக்தி  நிலையத்தில் ஏற்பட்ட கோளாறு” காரணமாகும். அது “ஆய்வில் உள்ளது”. அங்கு மின்சார உற்பத்தி குழுக்கள் (groupes électrogènes) மாவட்ட ஆணையத்துடன் இணைந்து அனுப்பப்பட்டு வருகின்றன.

பரிஸ் நகரத்திலும் சில சிறிய கோளாறுகள் ஏற்பட்டிருந்தாலும், அவை விரைவாக சரிசெய்யப்பட்டு, வாடிக்கையாளர்களுக்கு குறிப்பிடத்தக்க பாதிப்பு ஏற்படவில்லை என Enedis தெரிவித்துள்ளது.