Livret A சேமிப்பாளர்களுக்கு வட்டி வீதம் அதிகரிப்பு!!

பொருளாதார அமைச்சர் Roland Lescure, Livret A சேமிப்புக் கணக்கின் வட்டி விகிதம் ஆகஸ்ட் மாதத்தில் உயர்த்தப்படும் என்று அறிவித்துள்ளார். புதிய வட்டி விகிதம் ஜூலை 15-க்குள் அறிவிக்கப்படும் என்றும், இது மக்களின் வாங்கும் திறனை மேம்படுத்தும் நல்ல செய்தி என்றும் அவர் தெரிவித்தார். தற்போது இந்த வட்டி விகிதம் 1.5% ஆக உள்ளது.

Livret A சேமிப்புத் திட்டத்தை சுமார் 58 மில்லியன்  மக்கள் பயன்படுத்துகின்றனர். இதன் வட்டி விகிதம் ஆண்டுக்கு இருமுறை, பணவீக்கம் மற்றும் யூரோ மண்டலத்தின் குறுகியகால வட்டி விகிதத்தின் அடிப்படையில் மறுஆய்வு செய்யப்படுகிறது. சமீபத்திய எரிசக்தி விலை உயர்வால் பணவீக்கம் அதிகரித்துள்ளதால், வட்டியும் உயர வாய்ப்புள்ளது.

மே மாதத்தில் பல சேமிப்பாளர்கள் தங்களது Livret A கணக்குகளில் இருந்த பணத்தை எடுத்ததால், மொத்த சேமிப்பு 630 மில்லியன் யூரோக்கள் குறைந்தது. இருப்பினும், இந்தத் திட்டத்தில் மொத்தமாக 444.6 பில்லியன் யூரோக்கள் சேமிப்பாக இருப்பது, பிரெஞ்சு மக்களின் நம்பிக்கையை காட்டுகிறது.

2026 ஆம் ஆண்டிற்கான பொருளாதார வளர்ச்சி 0.5% முதல் 0.9% வரை இருக்கும் என்ற அரசின் கணிப்பை அமைச்சர் மீண்டும் உறுதிப்படுத்தினார். முதல் காலாண்டில் வளர்ச்சி குறைந்திருந்தாலும், அடுத்த காலாண்டுகளில் நுகர்வு அதிகரித்து, ஆண்டின் இறுதியில் பொருளாதாரம் முன்னேறும் என்ற நம்பிக்கையையும் அவர் வெளிப்படுத்தினார்.