Impots இணையதளத்தில் தரவுக் கசிவு!!

அதிகாரப்பூர்வ வரித்தளமான Impots.gouv.fr மீது ஜூன் மாத இறுதியில் சைபர் தாக்குதல் நடத்தப்பட்டதாக பொருளாதார அமைச்சகம் உறுதிப்படுத்தியுள்ளது. அடையாளத் திருட்டைத் தொடர்ந்து, தாக்குதலாளி Direction générale des finances publiques (DGFiP) அமைப்பின் தகவல் அமைப்புக்குள் சட்டவிரோதமாக நுழைந்ததாக தெரிவிக்கப்பட்டுள்ளது. 

இந்த நுழைவு பின்னர் முடக்கப்பட்டாலும், தனிநபர்கள் மற்றும் தொழில்முறை பயனர்களின் சில தரவுகளைப் பார்வையிடவும் பதிவிறக்கம் செய்யவும் முடிந்ததாக அமைச்சகம் கூறுகிறது. 

தற்போது எத்தனை பேரின் தகவல்கள் பாதிக்கப்பட்டுள்ளன என்பதும், துல்லியமாக எந்த வகையான தரவுகள் கசிந்துள்ளன என்பதும் அதிகாரப்பூர்வமாக முழுமையாகத் தெரியவில்லை. ஆனால் French Breaches என்ற சைபர் தாக்குதல்களை கண்காணிக்கும் தளம், சுமார் 678,437 பேர் பாதிக்கப்பட்டிருக்கலாம் எனக் குறிப்பிடுகிறது. இதில் 392,867 தனிநபர்களும் 285,570 தொழில்முறை பயனர்களும் அடங்குவதாக கூறப்படுகிறது. 

தாக்குதலாளி பெயர்கள், பிறந்த தேதிகள், முகவரிகள், நில அடையாளத் தகவல்கள், மற்றும் சொத்து தொடர்பான தகவல்கள் தன்னிடம் இருப்பதாகக் கூறியுள்ளார். பிரெஞ்சு பொருளாதார அமைச்சகத்தின் தகவல்படி, பாதிக்கப்பட்ட பயனர்களுக்கு தனிப்பட்ட முறையில் அறிவிப்பு அனுப்பப்படும். எந்தத் தகவல்கள் அணுகப்பட்டிருக்கலாம் என்பதையும், தேவையான பாதுகாப்பு நடவடிக்கைகள் என்ன என்பதையும் அந்த அறிவிப்பில் தெரிவிக்கப்படும். 

DGFiP மேலும் அணுகல்களைத் தடுக்க கூடுதல் கட்டுப்பாடுகளை உடனடியாக அமல்படுத்தியுள்ளதாகவும், விசாரணைகள் தொடர்ந்து நடைபெற்று வருவதாகவும் தெரிவித்துள்ளது. இந்த சம்பவம் தொடர்பாக ANSSI (பிரான்சின் தேசிய தகவல் பாதுகாப்பு நிறுவனம்) உள்ளிட்ட சம்பந்தப்பட்ட பாதுகாப்பு அமைப்புகளுடன் அதிகாரிகள் இணைந்து செயல்பட்டு வருகின்றனர். 

DGFiP இந்த சம்பவத்தை CNIL-க்கு அறிவித்து, காவல்துறையில் புகார் அளிக்க உள்ளது. விசாரணை முன்னேறும் போது கூடுதல் தகவல்கள் வெளியிடப்படும் என அமைச்சகம் தெரிவித்துள்ளது.