சுவிட்சர்லாந்தில் கோர தீ விபத்து! 41 பேர் பலி

சுவிட்சர்லாந்தின் கிரான்ஸ் மான்டானா (Crans Montana) ஸ்கை ரிசார்ட் பகுதியில் கடந்த புத்தாண்டு தினத்தன்று நிகழ்ந்த கோர தீ விபத்தில் 41 பேர் உயிரிழக்கக் காரணமான 'லெ கான்ஸ்டெல்லேஷன்' (Le Constellation) பாட்டின் உரிமையாளர், தனது மனைவி மீது வன்முறையில் ஈடுபட்ட குற்றச்சாட்டின் பேரில் கைது செய்யப்பட்டுள்ளார்.

பாட்டின் இணை உரிமையாளரான 49 வயதுடைய ஜாக்குவஸ் மொரெட்டி (Jaques Moretti), கடந்த ஓகஸ்ட் 11ஆம் திகதி தனது 41 வயது மனைவியான ஜெசிகா மொரெட்டி (Jessica Moretti) மீது கடுமையான தாக்குதல் நடத்தியதாகக் கூறப்படுகிறது.

இந்தத் தாக்குதலில் காயமடைந்த அவர் மருத்துவமனையில் அனுமதிக்கப்பட்டார். 2026ஆம் ஆண்டின் தொடக்கத்தைக் கொண்டாடிய கொண்டாட்டக்காரர்களைக் கொன்றழித்த இந்த மாபெரும் தீ விபத்து வழக்கில் தம்பதியினர் இருவரும் தற்போது விசாரணையை எதிர்நோக்கி வருகின்றனர்.

சுவிட்சர்லாந்தின் வாலாய்ஸ் (Valais) பகுதியில் உள்ள அவர்களின் இல்லத்தில் வைத்து கைது செய்யப்பட்ட மொரெட்டி, "விசாரணைக்கு முந்தைய காவலில் வைக்கப்பட்டுள்ளார்" என விசாரணை வட்டாரங்கள் தெரிவித்துள்ளன.

இவர் மீது பல உள்நாட்டு வன்கொடுமைக் குற்றச்சாட்டுகள் சுமத்தப்பட்டுள்ள நிலையில், இந்த ஆண்டு இறுதியில் நீதிமன்றத்தில் ஆஜர்படுத்தப்படவுள்ளதாக சுவிஸ் மற்றும் பிரெஞ்சு ஊடகங்கள் செய்தி வெளியிட்டுள்ளன.

இதுகுறித்து மொரெட்டி தம்பதியினரின் வழக்கறிஞர்கள் ஊடகவியலாளர்களிடம் தெரிவிக்கையில்: "தனிப்பட்ட வழக்கு ஒன்றில் விசாரிக்கப்படும் இந்தச் சம்பவங்கள் அவர்களின் அந்தரங்க வாழ்க்கையுடன் பிரத்தியேகமாகத் தொடர்புடையவை, எனவே நாங்கள் இது குறித்து எந்தக் கருத்தும் தெரிவிக்க மாட்டோம்.

இவை கான்ஸ்டெல்லேஷன் பேரழிவுடன் குழப்பிக்கொள்ளக் கூடாது. இருப்பினும், ஜனவரி 1ஆம் திகதி முதல் மொரெட்டி தம்பதியினர் கூட்டாக எதிர்கொள்ள முயன்று வரும் மிகவும் கடுமையான இன்னல்களுக்கு மத்தியில் இது நிகழ்ந்துள்ளது" என்றனர்.

இந்த வழக்கு, பார் தீ விபத்து வழக்கில் மொரெட்டி தம்பதியினர் மீதான குற்றச்சாட்டுகளுக்கான வழக்கிலிருந்து முற்றிலும் தனித்தனியாக விசாரிக்கப்படும்.

முன்னதாக, இந்த கோர தீ விபத்துக்குப் பிறகு அவர்கள் மீது மரணத்தை ஏற்படுத்துதல், கவனக்குறைவால் காயத்தை ஏற்படுத்துதல் மற்றும் கவனக்குறைவால் தீ விபத்தை ஏற்படுத்துதல்" போன்ற குற்றச்சாட்டுகள் சுமத்தப்பட்டமை குறிப்பிடத்தக்கது. இத்தீ விபத்தில் 41 பேர் உயிரிழந்ததுடன், 115 பேர் காயமடைந்தனர் என்பது குறிப்பிடத்தக்கது.