சோனல் தினுஷா சாதனை சதம் - 290 ஓட்டங்கள் குவித்து பாலோ ஆன் ஆன இலங்கை

290 ஓட்டங்கள் குவித்து இலங்கை பாலோ ஆன் ஆன நிலையில், சதமடித்த சோனல் தினுஷா சாதனை பட்டியலில் இணைந்துள்ளார்.

இந்தியா மற்றும் இலங்கை அணிகளுக்கு இடையிலான இரண்டாவது டெஸ்ட் போட்டி கொழும்பு மைதானத்தில் நடைபெற்று வருகிறது.

முதல் இன்னிங்ஸில் இந்திய அணி 503 ஓட்டங்கள் குவித்து டிக்ளேர் செய்துள்ளது. தேவ்தத் படிக்கல் மற்றும் துருவ் ஜுரெல் சதம் விளாசியுள்ளனர்.

இதனையடுத்து முதல் இன்னிங்ஸை தொடங்கிய இலங்கை அணி, 290 ஓட்டங்களுக்கு ஆல் அவுட் ஆனது.

213 ஓட்டங்கள் பின் தங்கிய நிலையில் இருந்த இலங்கை அணி பாலோ ஆன் ஆனது. இதையடுத்து, இலங்கை அணி 2வது இன்னிங்ஸை ஆடி வருகிறது.

இலங்கை தரப்பில் 103 ஓட்டங்கள் குவித்து சதம் விளாசிய சோனல் தினுஷா புதிய சாதனை ஒன்றை படைத்துள்ளார்.

இந்தியாவுக்கு எதிரான தனது முதல் 3 டெஸ்ட் இன்னிங்ஸ்களிலும் 80 அல்லது அதற்கு மேற்பட்ட ஓட்டங்களை எடுத்த மூன்றாவது வீரர் என்ற பெருமையை சோனல் தினுஷா பெற்றுள்ளார்.

முன்னதாக மேற்கிந்தியத் தீவுகளின் ஜாம்பவான் எவர்டன் வீக்ஸ் மற்றும் பாகிஸ்தான் ஜாம்பவான் ஜாகீர் அப்பாஸ் ஆகியோர் இந்த சாதனையை படைத்திருந்தனர்.

எவர்டன் வீக்ஸ் 1948 ஆம் ஆண்டிலும், ஜாகீர் அப்பாஸ் 1978 ஆம் ஆண்டிலும் இந்த சாதனையை படைத்துள்ளனர்.

48 ஆண்டுகளுக்கு பிறகு சோனல் தினுஷா இந்த சாதனையை முறியடித்துள்ளார்.

மேலும், இந்தியாவிற்கு எதிரான முதல் 2 டெஸ்ட் போட்டிகளிலும் சதமடித்துள்ள வீரர்களின் பட்டியலிலும் சோனல் தினுஷா இடம் பிடித்துள்ளார்.