Île-de-France ஆலங்கட்டி மழை மற்றும் பலத்த காற்று வீசும் அபாயம்!!

இன்று, வியாழக்கிழமை ஆகஸ்ட் 27, கடுமையான இடியுடன் கூடிய மழை மற்றும் புயல் ஏற்படும் அபாயம் அதிகரித்துள்ளது. மதியம் முதல் மாலை மற்றும் இரவு வரை நாட்டின் பல பகுதிகளில் சக்திவாய்ந்த இடியுடன் கூடிய மழை பெய்யக்கூடும். குறிப்பாக ஆலங்கட்டி மழை, பலத்த காற்று மற்றும் கனமழை ஏற்படும் அபாயம் இருப்பதால் வானிலை அதிகாரிகள் எச்சரிக்கை விடுத்துள்ளனர்.

இந்த புயல் சூழ்நிலை காரணமாக 44 மாவட்டங்களுக்கு செம்மஞ்சள் எச்சரிக்கையின் கீழ் வைக்கப்பட்டுள்ளன. Auvergne பகுதியிலிருந்து Bourgogne மற்றும் Vosges பகுதிகள் வரை மிகக் கடுமையான புயல்கள் உருவாகலாம். மேலும்  Île-de-France, Normandie, Pays-de-la-Loire மற்றும் வட பிரான்சின் சில பகுதிகளும் பாதிக்கப்படக்கூடும்.

சில இடங்களில் பெரிய அளவிலான ஆலங்கட்டிகள் விழலாம் என்றும், காற்றின் வேகம் மணிக்கு 110 கிலோ மீட்டர் அல்லது அதற்கு மேல் செல்லக்கூடும் என்றும் எச்சரிக்கப்பட்டுள்ளது. 

குறுகிய நேரத்தில் மிக அதிகமான மழை பெய்வதால் உள்ளூர் வெள்ளப்பெருக்கு ஏற்படும் அபாயமும் உள்ளது. சில பகுதிகளில் சுழற்காற்று போன்ற அரிய மற்றும் ஆபத்தான வானிலை நிகழ்வுகளும் நடை பெறக்கூடும்.

மக்கள் வானிலை எச்சரிக்கைகளை கவனமாகப் பின்பற்றவும், தேவையற்ற பயணங்களைத் தவிர்க்கவும் அறிவுறுத்தப்படுகிறார்கள். வெளியே இருக்கும் பொருட்களை பாதுகாப்பாக வைத்துக்கொள்வதும், மரங்கள் மற்றும் மின்கம்பங்களின் அருகில் செல்லாமல் இருப்பதும் அவசியம். போக்குவரத்து மற்றும் தொடருந்து சேவைகளிலும் இடையூறுகள் ஏற்படக்கூடும் என்பதால், அனைவரும் நிலைமையை தொடர்ந்து கவனித்து பாதுகாப்பு வழிமுறைகளைப் பின்பற்றவும் எச்சரிக்கை விடுத்துள்ளது.