SNCF பயணிகளுக்கு 150,000 TGV தள்ளுபடி டிக்கெட்டுகள் விற்பனைக்கு!!

இந்த ஃப்ளாஷ் சலுகை, "குறிப்பிட்ட நாட்கள், குறிப்பிட்ட தொடருந்துகள் மற்றும்  தேர்ந்தெடுக்கப்பட்ட சில இலக்குகள்" ஆகியவற்றுக்கு மட்டுமே பொருந்தும் என்று SNCF தெரிவித்துள்ளது. கோடை விடுமுறைக்காக ஏற்கனவே  32 மில்லியன் தொடருந்து டிக்கெட்டுகள் விற்கப்பட்டுள்ளன. இருப்பினும், சிலர் இன்னும் கடைசி நேரத்தில் முன்பதிவு செய்ய காத்திருக்கின்றனர். 

அவர்களின் காத்திருப்பு பயனுள்ளதாக இருக்கலாம், ஏனெனில் SNCF தனது TGV InOui அதிவேக தொடருந்துகளுக்காக புதிய ஃப்ளாஷ் சலுகையை அறிவித்துள்ளது. ஜூலை 28 முதல் ஜூலை 30 வரை, SNCF மொத்தம் 1,50,000 TGV InOui டிக்கெட்டுகளை விற்பனை செய்கிறது. இதில்:

• 1,00,000 இரண்டாம் வகுப்பு டிக்கெட்டுகள் – 19 யூரோக்கள்
• 50,000 முதல் வகுப்பு டிக்கெட்டுகள் – 29 யூரோக்கள்

இந்த டிக்கெட்டுகள் ஆகஸ்ட் 10 முதல் அக்டோபர் 1 வரை நடைபெறும் பயணங்களுக்கு மட்டுமே செல்லுபடியாகும். இந்த சலுகையின் கீழ் வாங்கப்படும் டிக்கெட்டுகளை மாற்றவோ அல்லது பணத்தைத் திரும்பப் பெறவோ முடியாது. மேலும், இந்த சலுகையை வேறு எந்த தள்ளுபடி சலுகையுடனும் இணைத்து பயன்படுத்த முடியாது.