காமன்வெல்த்தில் இந்தியாவிற்கு இரட்டை பதக்கம்

காமன்வெல்த் தொடரில், தமிழ்நாட்டை சேர்ந்த இரு வீரர்கள் பதக்கம் வென்றுள்ளனர்.

கிளாஸ்கோ2026 காமன்வெல்த் தொடரில் மும்முறை தாண்டுதலில், இந்தியாவிற்காக தமிழ்நாட்டை சேர்ந்த இரு வீரர்கள் வெள்ளி மற்றும் வெண்கல பதக்கத்தை வென்றுள்ளனர்.

இந்த போட்டியில், ஜமைக்கா வீரர் ஜோர்டான் ஸ்காட் 16.72 மீட்டர் தாண்டி தங்கப் பதக்கத்தை வென்றார்.

தமிழ்நாட்டை சேர்ந்த பிரவீன் சித்ரவேல் 16.58 மீட்டர் தாண்டி வெள்ளிப் பதக்கமும், செல்வ பிரபு திருமாரன் 16.52 மீட்டர் தாண்டி வெண்கலப் பதக்கத்தையும் வென்றுள்ளனர்.

பதக்கம் வென்ற வீரர்களுக்கு வாழ்த்து தெரிவித்துள்ள தமிழ்நாடு முதலமைச்சர் விஜய், பிரவீன் சித்ரவேலுக்கு ரூ.30 லட்சமும், வெண்கல பதக்கம் வென்ற செல்வ பிரபுவிற்கு ரூ.20 லட்சமும் ஊக்கதொகை அறிவித்துள்ளார்.

மதுரையை சேர்ந்த விவசாய குடும்பத்தை சேர்ந்த 21 வயதான செல்வ பிரபு, 2022 கேலோ இந்தியா இளைஞர் விளையாட்டுப் போட்டிகள் மற்றும் U20 ஃபெடரேஷன் கோப்பையில் தங்கப் பதக்கங்களையும், பல்கலைக்கழகங்களுக்கு இடையேயான சாம்பியன்ஷிப் போட்டிகள் மற்றும் கேலோ இந்தியா பல்கலைக்கழக விளையாட்டுப் போட்டிகளில் வெள்ளிப் பதக்கங்களையும் வென்றுள்ளார்.

2022 ஆம் ஆண்டு கொலம்பியாவில் நடைபெற்ற உலக 20 வயதுக்குட்பட்ட தடகள சாம்பியன்ஷிப் போட்டியில் வெள்ளிப் பதக்கம் வென்றார்.

மேலும், ஆசிய தடகள சங்கத்தால் (AAA) 'ஆண்டின் சிறந்த ஆசிய 20 வயதுக்குட்பட்ட ஆண் தடகள வீரர் என்ற விருதை பெற்ற முதல் இந்தியர் என்ற பெருமையை பெற்றுள்ளார்.

தஞ்சாவூர் மாவட்டத்தில் உள்ள விவசாய குடும்பத்தை சேர்ந்த பிரவீன் சித்ரவேல், கர்நாடகாவின் மங்களூரில் உள்ள கல்லூரியில் படித்து பி.ஏ பட்டம் பெற்றுள்ளார்.

பிரவீன் சித்ரவேல் கேலோ இந்தியா பள்ளி விளையாட்டுப் போட்டிகளில் தங்கம், கோயம்புத்தூரில் நடைபெற்ற இளையோர் தேசிய சாம்பியன்ஷிப் போட்டியில் பிரவீன் வெள்ளி என படிக்கும் போதே பல்வேறு பதக்கங்களை வென்றுள்ளார்.

2018 ஆம் ஆண்டு நடைபெற்ற இளையோர் ஒலிம்பிக் போட்டியில், ஆடவர் மும்முறைத் தாண்டுதலில் வெண்கலப்பதக்கம் வென்றுள்ளார்.

குத்துச்சண்டை இறுதிப் போட்டிகளில் பங்கேற்ற இந்தியாவின் பிரீதி பவார் (Preeti Pawar) 54 கிலோ எடைப் பிரிவிலும் ஜேஸ்மின் லம்போரியா (Jaismine Lamboria) 57 கிலோ எடைப் பிரிவிலும் தங்கம் வென்றுள்ளனர்.

தற்போது, 8 தங்கம், 15 வெள்ளி, 7 வெண்கல பதக்கங்கள் உட்பட 30 பதக்கங்களுடன் இந்தியா பதக்க பட்டியலில் 6வது இடத்திற்கு முன்னேறியுள்ளது.