மதுராந்தகத்தில் தீவிர வாகன சோதனை

செங்கல்பட்டு மாவட்டம், மதுராந்தகம் சட்டமன்ற தொகுதிக்கு அடுத்த மாதம் 6-ந் தேதி இடைத்தேர்தல் நடைபெற உள்ளது. இதையொட்டி தேர்தல் நடத்தை விதிமுறைகள் அமலுக்கு வந்துள்ளன. இதன் காரணமாக மதுராந்தகம் தொகுதியில் சுவரொட்டிகள், பேனர்கள், சுவர் விளம்பரங்கள் உள்ளிட்டவை அகற்றப்பட்டு வருகின்றன. மேலும், அரசியல் கட்சிகளின் கொடிகள் மற்றும் கொடிக்கம்பங்களும் அகற்றப்பட்டுள்ளன.

தேர்தல் நடத்தை விதிமுறைகள் அமலில் உள்ள நிலையில், வாக்காளர்களுக்கு பணம், பரிசுப்பொருட்கள் உள்ளிட்டவை வழங்கப்படுவதைத் தடுக்கும் வகையில் தேர்தல் பறக்கும் படையினர் தீவிர கண்காணிப்பில் ஈடுபட்டு வருகின்றனர்.

### வாகனங்களில் சோதனை

மதுராந்தகம் பகுதிக்குள் நுழையும் கார், வேன் உள்ளிட்ட வாகனங்களை தேர்தல் பறக்கும் படையினர் தீவிரமாக சோதனை செய்து வருகின்றனர். வாகனங்களில் பணம், பரிசுப்பொருட்கள் மற்றும் தேர்தல் விதிமுறைகளை மீறும் பொருட்கள் ஏதேனும் கொண்டு செல்லப்படுகிறதா? என்பது குறித்து சோதனை நடத்தப்படுகிறது.

இந்த சோதனையின்போது, கார்களில் பொருத்தப்பட்டிருந்த அரசியல் கட்சிகளின் கொடிகள் அகற்றப்பட்டன. பின்னர் அந்த வாகனங்கள் மதுராந்தகம் பகுதிக்குள் அனுமதிக்கப்பட்டன.

தேர்தல் விதிமுறைகள் முறையாக கடைபிடிக்கப்படுகிறதா? என்பதை கண்காணிக்கும் வகையில், மதுராந்தகம் தொகுதி முழுவதும் தொடர்ந்து வாகன சோதனை மற்றும் கண்காணிப்பு பணிகள் நடைபெறும் என அதிகாரிகள் தெரிவித்தனர்.