முதல்வர் விஜய் லண்டன் பயணத்தில் ரூ.15,300 கோடி முதலீடு ஈர்ப்பு

முதல்வர் விஜயின் லண்டன் பயணத்தின் மூலம் ரூ.15,300 கோடிக்கும் அதிகமான முதலீட்டு முன்மொழிவுகள் மற்றும் உறுதிமொழிகள் பெறப்பட்டுள்ளதாக தமிழக அரசு தெரிவித்துள்ளது. இதன் மூலம் நேரடியாகவும், மறைமுகமாகவும் 10 ஆயிரம் பேருக்கு வேலைவாய்ப்பு உருவாகும் என கூறப்பட்டுள்ளது.

**இது தொடர்பாக தமிழக அரசு வெளியிட்ட அறிக்கையில் கூறப்பட்டுள்ளதாவது:**

முதல்வர் விஜய் முன்னிலையில் நேற்று லண்டனில், தமிழக அரசின் முதலீட்டு மேம்பாட்டு முகமையான வழிகாட்டி நிறுவனத்திற்கும் சர்வதேச நிறுவனங்களுக்கும் இடையே புரிந்துணர்வு ஒப்பந்தங்கள் மேற்கொள்ளப்பட்டன.

சர்வதேச வாகன உதிரிபாகங்கள் தயாரிப்பு நிறுவனம் ஒன்று, இந்தியாவில் தனது முதல் உற்பத்தி ஆலையை தமிழகத்தில் அமைப்பதற்கான விருப்பக் கடிதத்தை வழங்கியுள்ளது.

தமிழகத்தில் ஹிந்துஜா குழுமம் மேற்கொண்டு வரும் முதலீடுகளின் தற்போதைய முன்னேற்ற நிலை குறித்தும் அந்த நிறுவனம் முதல்வர் விஜயிடம் விளக்கம் அளித்துள்ளது.

புரிந்துணர்வு ஒப்பந்தங்கள் மற்றும் விருப்பக் கடிதம் மூலம் ரூ.15,300 கோடிக்கும் அதிகமான முதலீடுகள் ஈர்க்கப்பட்டுள்ளன. இதன் மூலம் நேரடியாகவும், மறைமுகமாகவும் 10 ஆயிரம் பேருக்கு வேலைவாய்ப்பு உருவாகும்.

* **சம்வர்தனா மதர்சன் இன்டர்நேஷனல் நிறுவனம்:** தமிழகத்தில் ரூ.11 ஆயிரம் கோடி மதிப்பில் புதிய முதலீடு செய்கிறது. இதன் மூலம் 7 ஆயிரம் பேருக்கு வேலைவாய்ப்பு கிடைக்கும்.

* **வில்சன் பவர் சொல்யூஷன்ஸ் நிறுவனம்:** திருவள்ளூரில் மின்மாற்றி உற்பத்திப் பணிகளில் ரூ.300 கோடி முதலீடு செய்கிறது. இதன் மூலம் 400 பேருக்கு வேலைவாய்ப்பு கிடைக்கும்.

* **சிக்மா டெக்னாலஜி குழுமம் மற்றும் எர்ன்ஸ்ட் யங் நிறுவனங்கள்:** திறன் மையங்களை விரிவுபடுத்த புரிந்துணர்வு ஒப்பந்தங்கள் மேற்கொள்ளப்பட்டுள்ளன. இதன் மூலம் 600 பேருக்கு வேலைவாய்ப்பு கிடைக்கும்.

**விருப்பக் கடிதம்**

ஐரோப்பாவின் முன்னணி வாகன உதிரிபாகங்கள் தயாரிப்பு நிறுவனம் ஒன்று, இந்தியாவில் மேற்கொள்ள உள்ள ரூ.3 ஆயிரம் கோடி முதலீட்டிற்கு தமிழகத்தை விரும்பத்தக்க இடமாக கருதுவதாக விருப்பக் கடிதம் அளித்துள்ளது.

அசோக் லேலண்ட் நிறுவனத்தின் நிர்வாக தலைவர் தீரஜ் ஹிந்துஜா, பினோலெக்ஸ் இண்டஸ்ட்ரீஸ் லிமிடெட் நிறுவனத்தின் நிர்வாக தலைவர் பிரகாஷ் சாப்ரியா, இயக்குனர் ரீட்டா ஹிந்துஜா சாப்ரியா மற்றும் ஹிந்துஜா குழுமத்தை சேர்ந்த வெங்கடேசன் ஆகியோர் முதல்வர் விஜயை சந்தித்து பேசினர்.

அப்போது, தமிழகத்தில் ஹிந்துஜா குழுமம் மேற்கொண்டுள்ள முதலீடுகள் குறித்து முதல்வர் விஜயிடம் அவர்கள் விளக்கம் அளித்தனர். இவ்வாறு அந்த அறிக்கையில் கூறப்பட்டுள்ளது.