13 வயதுக்குக் குறைவான குழந்தைகளுக்கு சமூக வலைத்தளத் தடை !!

ஐரோப்பிய ஆணையத் தலைவர் உர்சுலா வான் டெர் லேயன், 13 வயதுக்குக் குறைவான குழந்தைகள் சமூக வலைத்தளங்களைப் பயன்படுத்துவதைத் தடுக்கவும், 15 வயது வரை உள்ள சிறார்களின் கணக்குகளை அதிக கட்டுப்பாட்டுடன் வைத்திருக்கவும் புதிய விதிமுறைகளை முன்மொழிந்துள்ளார். செப்டம்பர் 16, 2026 அன்று ஐரோப்பிய நாடாளுமன்றத்தில் ஆற்றிய உரையில் அவர் இந்தத் திட்டத்தின் முக்கிய அம்சங்களை வெளியிட்டார். இந்த முன்மொழிவுகள் “EU Kids Act” எனப்படும் புதிய ஐரோப்பிய சட்டத் திட்டத்தின் மூலம் செப்டம்பர் 17 விரிவாக முன்வைக்கப்பட உள்ளன.

இந்தத் திட்டத்தின் கீழ், 13 வயதுக்குக் குறைவான குழந்தைகள் சமூக வலைத்தளங்களுக்கான தனிப்பட்ட கணக்குகளை வைத்திருக்க முடியாது. 13 முதல் 15 வயது வரையிலான சிறார்களுக்கு பெற்றோரின் அனுமதி மற்றும் கண்காணிப்புடன் மட்டுமே பயன்படுத்தக்கூடிய வரையறுக்கப்பட்ட “மினி-கணக்குகள்” வழங்கப்படலாம். இந்தக் கணக்குகளில் சில செயல்பாடுகள் முடக்கப்படும் என்றும், பயன்பாட்டு நேரத்திற்கும் கட்டுப்பாடு விதிக்கப்படலாம் என்றும் முன்மொழிவு தெரிவிக்கிறது. 15 வயதுக்குப் பிறகே சிறார்கள் தாங்களாகவே சமூக வலைத்தளக் கணக்குகளைத் திறக்க அனுமதிக்கப்படுவார்கள்.

குழந்தைகளை ஒன்லைன் ஆபத்துகளிலிருந்து பாதுகாப்பதே இந்த நடவடிக்கைகளின் முக்கிய நோக்கமாகக் கூறப்படுகிறது. அதிகப்படியான திரைப் பயன்பாடு, இணையத் தொல்லை (cyberbullying), தூக்கக் குறைவு, உணவுப் பழக்கக் கோளாறுகள் மற்றும் பாலியல் நோக்கத்துடன் அணுகுதல் போன்ற பல்வேறு அபாயங்கள் குறித்து ஐரோப்பிய ஆணையம் கவலை தெரிவித்துள்ளது. மேலும், குழந்தைகளை நீண்ட நேரம் தளத்தில் வைத்திருக்கச் செய்யும் முடிவில்லா scrolling மற்றும் தனிப்பயனாக்கப்பட்ட பரிந்துரைகள் போன்ற “அடிமையாக்கும்” அம்சங்களையும் தளங்கள் கட்டுப்படுத்த வேண்டும் என முன்மொழியப்பட்டுள்ளது.

இந்த விதிமுறைகள் சமூக வலைத்தளங்களுக்கு மட்டுமல்லாமல், சில ஆன்லைன் வீடியோ சேவைகள், சிறார்களுக்கு ஆபத்தை ஏற்படுத்தக்கூடிய ஒன்லைன் விளையாட்டுகள், செயற்கை நுண்ணறிவு chatbot-கள் மற்றும் AI உதவியாளர்கள் போன்ற சேவைகளுக்கும் பொருந்தக்கூடும். விதிகளை மீறும் நிறுவனங்களுக்கு அவர்களின் உலகளாவிய வருவாயில் 6% வரை அபராதம் விதிக்கப்படலாம் என முன்மொழிவு குறிப்பிடுகிறது. இந்தத் திட்டம் இன்னும் இறுதி சட்டமாகவில்லை; இதற்கு ஐரோப்பிய நாடாளுமன்றம் மற்றும் ஐரோப்பிய ஒன்றியத்தின் 27 உறுப்பு நாடுகளின் ஒப்புதல் தேவைப்படும்.