மருத்துவச் செலவுகள் அதிகரிப்பு: காப்பீட்டு கட்டணங்கள் உயரும் அபாயம்!!

பிரெஞ்சு தேசிய மியூச்சுவல் கூட்டமைப்பின் (FNMF) தலைவர் Éric Chenut, கூடுதல் சுகாதாரக் காப்பீட்டுத் திட்டங்களுக்கு விதிக்கப்படும் வரிகளை குறைக்குமாறு நாடாளுமன்ற உறுப்பினர்களிடம் கோரிக்கை விடுத்துள்ளார். வரிகள் கடந்த 20 ஆண்டுகளில் 400 மில்லியன் யூரோவிலிருந்து 7.5 பில்லியன் யூரோவாக உயர்ந்துள்ளதால், காப்பீட்டாளர்களின் கட்டணங்களும் அதிகரித்து வருவதாக அவர் தெரிவித்துள்ளார்.

அரசு, அடுத்த ஆண்டு முதல் சில மருத்துவச் செலவுகளுக்கான Assurance Maladie-யின் திருப்பிச் செலுத்தும் தொகையை குறைத்து, அந்தச் செலவின் ஒரு பகுதியை கூடுதல் சுகாதாரக் காப்பீட்டு நிறுவனங்களுக்கு மாற்ற உள்ளது. பல் சிகிச்சைகள், சில மருந்துகள் மற்றும் மருத்துவ சாதனங்கள் போன்றவற்றுக்கான கூடுதல் செலவுகளை இந்த நிறுவனங்கள் ஏற்க வேண்டியிருக்கும்.

இதனால் காப்பீட்டு நிறுவனங்களின் செலவுகள் அதிகரித்து, அதன் தாக்கம் பொதுமக்கள் செலுத்தும் காப்பீட்டு கட்டணங்களில் ஏற்படக்கூடும் என்று Éric Chenut எச்சரித்துள்ளார். எனவே, வரிச்சுமையை குறைத்தால், கட்டண உயர்வைத் தடுக்கவும், சில சந்தர்ப்பங்களில் கட்டணங்களைக் குறைக்கவும் முடியும் என்று அவர் கூறுகிறார்.

கூடுதல் சுகாதாரக் காப்பீட்டு கட்டணங்கள் ஏற்கனவே கடந்த சில ஆண்டுகளில் வேகமாக உயர்ந்துள்ளன: 2022-ல் 2.9%, 2023-ல் 6%, 2024-ல் 8.2% என அதிகரித்து, 2024-ல் மொத்தம் 46.5 பில்லியன் யூரோவை எட்டின. மருத்துவச் செலவுகள் அதிகரித்தல், அரசின் திருப்பிச் செலுத்தும் முறையில் ஏற்பட்ட மாற்றங்கள் மற்றும் மருத்துவச் சேவைகளின் பயன்பாடு அதிகரித்தல் ஆகியவை இந்த உயர்வுக்கான முக்கிய காரணங்களாகக் குறிப்பிடப்படுகின்றன.