மக்ரோன் - டிரம்ப் உடன் சந்திப்பு: உக்ரைன் போர், எரிசக்தி நெருக்கடி குறித்து முக்கிய பேச்சு!!

அமெரிக்க அதிபர் டிரம்ப் மற்றும் பிரான்ஸ் ஜனாதிபதி இம்மானுவல் மக்ரோன் ஆகியோர் செப்டெம்பர் மாதம் 21ஆம் திகதி திங்கட்கிழமை  நியுயார்க் நகரில் சுமார் 30 நிமிடங்கள் தனிப்பட்ட முறையில் சந்தித்துப் பேச்சுவார்த்தை நடத்தினர். ஐ.நா. வருடாந்த உச்சி மாநாட்டையொட்டி நடைபெற்ற இந்த சந்திப்பில் மத்திய தரைக்கடல் நிலவரம் மற்றும் உக்ரைன் போர் உள்ளிட்ட முக்கிய விவகாரங்கள் குறித்து கலந்துரையாடப்பட்டன. சந்திப்பு மிகவும் ஆக்கபூர்வமாக அமைந்ததாக மக்ரோன் தெரிவித்தார். இந்த இரு மோதல்களும் உலக அமைதி மற்றும் பாதுகாப்புக்கு முக்கியமானவை என்றும், பிரெஞ்சு மக்களின் வாங்கும் சக்தியிலும் நேரடி தாக்கத்தை ஏற்படுத்துவதாகவும் அவர் குறிப்பிட்டார்.

ஹோர்முஸ் நீரிணையை மீண்டும் திறப்பதற்கான நடவடிக்கைகளை மேற்கொள்வது மற்றும் எரிபொருள் விநியோகத்தை அதிகரிப்பது குறித்தும் இரு தலைவர்களும் விவாதித்துள்ளனர். உலகளாவிய வர்த்தகத்தில் சுமார் 20 சதவீத ஹைட்ரோகார்பன் போக்குவரத்து இந்த நீரிணை வழியாக இடம்பெறுவதாக மக்ரோன் கூறினார். மேலும், உக்ரைனுக்கு ஏவுகணைத் தடுப்பு அமைப்புகள் உள்ளிட்ட கூடுதல் இராணுவ உதவிகளை விரைவாகவும் அதிகளவிலும் வழங்க வேண்டியதன் அவசியம் குறித்தும் டிரம்ப் உடன் நீண்ட நேரம் கலந்துரையாடியதாக அவர் தெரிவித்தார்.

இதேவேளை, உக்ரைனின் எரிசக்தி கட்டமைப்பை பாதுகாப்பது தொடர்பாக எரிசக்தி தாக்குதல்களுக்கு தற்காலிக தடையை ஏற்படுத்தும் முயற்சிகள் குறித்தும் ஆலோசிக்கப்பட்டதாக மக்ரோன் கூறினார்.இதனிடையே, உக்ரைன் விவகாரத்தில் அமெரிக்கா தொடர்ந்து ஆதரவை வழங்க வேண்டும் என்றும், ரஷ்யா மீது அழுத்தத்தை மேலும் அதிகரிக்க வேண்டும் என்றும் டிரம்ப்-ஐ வலியுறுத்தும் நோக்கில் தான் வெளிப்படையாகப் பேசுவதாக மக்ரோன் முன்னதாக தெரிவித்திருந்தார். 

ஐரோப்பிய நாடுகளும் ரஷ்யா–உக்ரைன் மோதலுக்கான தீர்வில் அமெரிக்கா தொடர்ந்து முழுமையாக ஈடுபட வேண்டும் என்றும், எதிர்கால ஐரோப்பிய பாதுகாப்பு கட்டமைப்பு தொடர்பான பேச்சுவார்த்தைகளில் தங்களையும் இணைக்க வேண்டும் என்றும் கோரிக்கை விடுத்துள்ளன. இதற்கிடையில், டிரம்ப்-ன் தூதர்கள் Jared Kushner மற்றும் Steve Witkoff செப்டெம்பரில் கீவ் நகருக்கு சென்று அமெரிக்காவின் சமரச முயற்சிகளை மீண்டும் முன்னெடுத்துள்ளனர். எனினும், முன்னதாக நடைபெற்ற பல சுற்று முத்தரப்பு பேச்சுவார்த்தைகள் குறிப்பிடத்தக்க முன்னேற்றமின்றி முடிவடைந்திருந்தமை குறிப்பிடத்தக்கது.