தம்பதிகள் கற்றுக்கொள்ள வேண்டிய 7 முக்கிய விடயங்கள்

சூர்யா - ஜோதிகா தங்களது 20வது திருமண நாளை சிறப்பாக கொண்டாடியுள்ளனர். அவர்கள் பகிர்ந்த "20 years of love and war" வீடியோவுக்கு ரசிகர்களிடம் நல்ல வரவேற்பு கிடைத்துள்ளது. நீடித்த திருமண வாழ்க்கைக்கு இவர்களிடம் இருந்து தம்பதிகள் கற்றுக்கொள்ள வேண்டிய 7 முக்கிய உறவுப் பாடங்களை இங்கே பார்க்கலாம்.

சூர்யா மற்றும் ஜோதிகாவின் 20வது திருமண நாள் கொண்டாட்டம் தமிழ் சினிமா வட்டாரத்தில் மட்டுமல்ல, சமூக வலைத்தளங்களிலும் பெரும் வரவேற்பை பெற்றது. இன்ஸ்டாகிராமில் அவர்கள் பகிர்ந்த "The Sequel" வீடியோ, வெறும் நட்சத்திர தம்பதியினரின் கொண்டாட்டம் மட்டுமல்ல; ஒரு நீண்ட கால உறவின் யதார்த்தத்தையும் அழகையும் பிரதிபலிப்பதாக அமைந்தது. அந்த வீடியோவுக்கு "20 years of love and war" என்று அவர்கள் குறிப்பிட்டிருந்தது, ஒரு வெற்றிகரமான திருமணம் என்பது சண்டைகளே இல்லாத வாழ்க்கை அல்ல; அனைத்து சவால்களையும் கடந்து ஒருவரை ஒருவர் தேர்வு செய்து கொண்டே இருப்பதுதான் என்பதை நினைவூட்டியது.

தமிழ் சினிமாவில் மிகவும் விரும்பப்படும் தம்பதிகளில் ஒருவராக இருக்கும் சூர்யா - ஜோதிகா, கடந்த 20 ஆண்டுகளாக காதல், நம்பிக்கை மற்றும் பரஸ்பர மரியாதையுடன் உறவை வலுவாக வைத்துள்ளனர். இவர்களிடம் இருந்து, நாம் கற்றுக்கொள்ள வேண்டிய 7 மிக முக்கியமான உறவுப் பாடங்கள் இதோ:

நல்ல கணவன் - மனைவியாக இருப்பதற்கு முன் நல்ல நண்பர்களாக இருங்கள்

சூர்யா - ஜோதிகா உறவின் மிகப்பெரிய பலம் அவர்களுக்கு இடையேயான நட்பாக தான் இருக்க முடியும். ஒரு திருமணம் வெறும் காதலால் மட்டுமே நீண்ட காலம் தாக்குப் பிடிக்காது. ஒருவரையொருவர் தீர்ப்பளிக்காமல் புரிந்துகொள்ளும் நண்பர்களாகவும் இருக்க வேண்டும். உறவில் நட்பு பலமாக இருக்கும்போது, கருத்து வேறுபாடுகளும் சண்டைகளும் எளிதில் கரைந்துபோகும். வாழ்க்கையின் ஏற்றத் தாழ்வுகளில் ஒருவருக்கு ஒருவர் துணையாக நிற்கவும் உதவுகிறது.

துணையின் கனவுகளுக்கு ஆதரவாக இருங்கள்

திருமணத்திற்கு பிறகு சினிமாவில் இருந்து சில காலம் ஒதுங்கியிருந்த ஜோதிகா, மீண்டும் தனது செகண்ட் இன்னிங்ஸில் சாதித்தபோது சூர்யாவின் முழுமையான ஆதரவு அவருக்கு இருந்தது. அதேபோல் சூர்யாவின் தொழில் வளர்ச்சியிலும் ஜோதிகா உறுதுணையாக இருந்து வந்துள்ளார். ஒரு உறவில் இருவரும் தங்களது கனவுகளை நிறைவேற்றும் சுதந்திரத்தை பெற்றிருக்க வேண்டும். ஒருவரின் வளர்ச்சியை மற்றொருவர் ஆதரிக்கும் போது உறவு மேலும் வலுப்பெறும்.

முழுமையான மனிதர்கள் யாரும் இல்லை என்பதை ஏற்றுக்கொள்ளுங்கள்

"இது ஒரு பர்ஃபெக்ட் திருமணத்தின் கொண்டாட்டம் அல்ல" என்று ஜோதிகா குறிப்பிட்டிருந்தார். புரிதல், தியாகம், சமரசம் மற்றும் பொறுமை ஆகியவையே அவர்களது உறவின் அடித்தளம் என்பதை வெளிப்படுத்தியிருந்தார். பல உறவுகள் தோல்வியடைவதற்கான முக்கிய காரணங்களில் ஒன்று, துணையிடம் முழுமையை எதிர்பார்ப்பது. ஆனால் உண்மையில் குறைகளுடன் ஒருவரை ஏற்றுக்கொள்வதே நீடித்த உறவின் ரகசியம்.

காதலை விட மரியாதை முக்கியம்

சூர்யா பல நேர்காணல்களில், ஒரு உறவு நீடிக்க பரஸ்பர மரியாதை மிகவும் அவசியம் என்று கூறியுள்ளார். காதல் இருவரையும் இணைக்கலாம். ஆனால் மரியாதைதான் அவர்களை நீண்ட காலம் ஒன்றாக வைத்திருக்க உதவுகிறது. கருத்து வேறுபாடுகள் இருந்தாலும் ஒருவரின் உணர்வுகளையும் முடிவுகளையும் மதிப்பது ஆரோக்கியமான உறவின் முக்கிய அடையாளமாகும்.

தனிப்பட்ட வளர்ச்சிக்கு இடமளித்தல்

ஆரோக்கியமான உறவில், இருவரும் தனிப்பட்ட முறையில் வளர்வதற்கான இடம் இருக்க வேண்டும். சூர்யா மற்றும் ஜோதிகா இருவரும் தங்களது தொழில், சமூகப் பணிகள் மற்றும் தனிப்பட்ட இலக்குகளில் தொடர்ந்து கவனம் செலுத்தி வருகின்றனர். ஒருவரின் கனவுகளையும் விருப்பங்களையும் மற்றொருவர் மதிக்கும் போது, உறவில் அழுத்தம் குறைந்து புரிதல் அதிகரிக்கும். தனிப்பட்ட வளர்ச்சிக்கு இடமளிப்பது, உறவை நீண்ட காலம் ஆரோக்கியமாக வைத்திருக்க உதவும்​

குடும்பத்திற்கு முன்னுரிமை
சூர்யா மற்றும் ஜோதிகா தங்களது பிஸியான திரைப்பட வாழ்க்கைக்கு இடையிலும் குடும்பத்திற்கு எப்போதுமே முதலிடம் கொடுத்து வருவது பாராட்டுக்குரியது. குறிப்பாக, தங்களது 20வது திருமண நாள் கொண்டாட்டத்தில் குழந்தைகளையும் நெருங்கிய குடும்பத்தினரையும் இணைத்து கொண்டு அவர்கள் கொண்டாடிய விதம், குடும்பத்தின் முக்கியத்துவத்தை அழகாக உணர்த்துகிறது. ஒரு உறவு ஆரோக்கியமாகவும் பலமாகவும் நீடிக்க வேண்டுமென்றால், வேலைக்கும் தனிப்பட்ட வாழ்க்கைக்கும் இடையில் சரியான சமநிலையைப் கொண்டிருப்பது முக்கியம். குடும்பத்திற்குத் தகுந்த முன்னுரிமை அளிப்பதன் மூலமாக தம்பதிகளுக்கு இடையேயான பிணைப்பு மேலும் வலுவடையும்.

உறவின் முக்கிய தருணங்களை கொண்டாடுங்கள்
20 ஆண்டுகளுக்குப் பிறகும் திருமண உறுதிமொழிகளை புதுப்பித்துக் கொண்ட சூர்யா - ஜோதிகா, உறவில் முக்கிய தருணங்களை கொண்டாடுவதன் அவசியத்தை எடுத்துக்காட்டியுள்ளனர். திருமண நாள், சிறிய வெற்றிகள், குடும்ப சாதனைகள் போன்ற தருணங்களை ஒன்றாக கொண்டாடுவது தம்பதிகளுக்கு இடையேயான பிணைப்பை மேலும் வலுப்படுத்த உதவும்.

ஆய்வு சொல்வது என்ன?

நீண்ட கால திருமண வாழ்க்கை குறித்து மேற்கொள்ளப்பட்ட Journal of Marriage and Family ஆய்வின்படி, பரஸ்பர ஆதரவு, திறந்த உரையாடல், நம்பிக்கை மற்றும் உறவில் திருப்தி ஆகியவை திருமண வாழ்க்கையை நீடிக்கச் செய்யும் மிக முக்கிய காரணிகளாக விளங்குகின்றன. குறிப்பாக, அன்றாட வாழ்வில் தனது துணைக்கு மனப்பூர்வமாக நன்றியுணர்வை வெளிப்படுத்தும் தம்பதிகள் வழக்கமான தம்பதிகளைவிட அதிக உறவு திருப்தியையும் நீண்ட கால நிலைத்தன்மையையும் அனுபவிப்பதாக அந்த ஆய்வு எடுத்துரைக்கிறது.

சூர்யா - ஜோதிகாவின் வாழ்க்கை பயணம் குறையற்ற உறவு என்பதற்காக அல்ல; மாறாக சவால்களை அன்போடும் மரியாதையோடும் இணைந்து எதிர்கொண்டதாலேயே சிறந்து விளங்குகிறது. நீடித்த உறவுக்கு காதல் மட்டுமல்லாமல், நட்பு, நம்பிக்கை, பொறுமை மற்றும் பரஸ்பர மரியாதையே உண்மையான ரகசியம் என்பதை இவர்களின் 20 ஆண்டு பயணம் பலருக்கு அழகான உத்வேகமாக உணர்த்துகிறது.