2028ல் செயல்பாட்டுக்கு வரும் முதல் செமிகண்டக்டர் ஆலை

குஜராத்தில் அமைக்கப்பட்டு வரும் நாட்டின் முதல் செமிகண்டக்டர் ஆலை, வரும் 2028-ம் ஆண்டு செயல்பாட்டுக்கு வரும் என எதிர்பார்க்கப்படுகிறது. இதுதவிர, நாடு முழுவதும் மேலும் 10 செமிகண்டக்டர் உற்பத்தி ஆலைகளை அமைக்கும் திட்டங்களும் பல்வேறு கட்டங்களில் உள்ளன. இதன் மூலம் செமிகண்டக்டர் துறையில் இந்தியா அடுத்த கட்டத்தை நோக்கி நகர்ந்து வருவது புதிய நம்பிக்கையை ஏற்படுத்தியுள்ளது.

ஸ்மார்ட்போன்கள், கணினிகள், மருத்துவ உபகரணங்கள், பாதுகாப்புத்துறை சாதனங்கள், தரவு மையங்கள் உள்ளிட்ட பெரும்பாலான மின்னணு சாதனங்களின் செயல்பாட்டுக்கு செமிகண்டக்டர் எனப்படும் சிப்கள் இன்றியமையாதவை. தகவல்களை சேமிக்கவும், மின்சாரத்தை கட்டுப்படுத்தவும் இவை உதவுகின்றன.

புதுப்பிக்கத்தக்க எரிசக்தி, குவாண்டம் தொழில்நுட்பம், அணுசக்தி தொழில்நுட்பம் ஆகியவற்றுடன் செமிகண்டக்டரும் எதிர்காலத்தை மாற்றக்கூடிய முக்கிய தொழில்நுட்பமாக கருதப்படுகிறது. தற்சார்பு இந்தியாவை உருவாக்குவதிலும் செமிகண்டக்டர் முக்கியப் பங்கு வகிக்கும் என எதிர்பார்க்கப்படுகிறது.

இதன் காரணமாக, உள்நாட்டில் செமிகண்டக்டர் உற்பத்தித் திறனை அதிகரிக்க மத்திய அரசு முன்னுரிமை அளித்து வருகிறது. அதன்படி, குஜராத்தின் தோலேராவில் நாட்டின் முதல் செமிகண்டக்டர் தொழிற்சாலை வேகமாக அமைக்கப்பட்டு வருகிறது. இந்த ஆலை வரும் 2028-ம் ஆண்டு செயல்பாட்டுக்கு வரும் என எதிர்பார்க்கப்படுகிறது. இதுதவிர, நாடு முழுவதும் மேலும் 10 செமிகண்டக்டர் உற்பத்தி ஆலைகளை அமைக்கும் திட்டங்களும் பல்வேறு கட்டங்களில் உள்ளன.

செமிகண்டக்டர் உற்பத்தியில் இந்தியாவை முன்னுரிமை மையமாக மாற்றுவதற்கான அனைத்து நடவடிக்கைகளும் மேற்கொள்ளப்பட்டு வருகின்றன. இதன் மூலம் புதிய கண்டுபிடிப்புகள், முதலீடுகள் மற்றும் வளர்ச்சிக்கான வாய்ப்புகள் உருவாகி வருகின்றன. இதனால், செமிகண்டக்டர் துறையில் இந்தியாவின் சந்தை மதிப்பு 2031-ம் ஆண்டில் ரூ.1.66 லட்சம் கோடியாக உயரும் என தொழில்துறை ஆய்வாளர்கள் கணித்துள்ளனர்.

கடந்த வாரம் டெல்லியில் நடைபெற்ற ‘செமிகான் இந்தியா 2026’ மாநாட்டை தொடங்கி வைத்து பேசிய பிரதமர் மோடியும் இதை உறுதிப்படுத்தினார். குறிப்பாக, ‘செமிகான் இந்தியா 2.0’ திட்டத்துக்கான நிதி ஒதுக்கீடு ரூ.76,000 கோடியில் இருந்து ரூ.1.27 லட்சம் கோடியாக உயர்த்தப்பட்டுள்ளதாக அவர் தெரிவித்தார். இதுவரை 12 சிப் தயாரிப்பு திட்டங்களுக்கு ஒப்புதல் அளிக்கப்பட்டுள்ள நிலையில், அடுத்த கட்டத்தில் இந்த எண்ணிக்கை மேலும் அதிகரிக்கும் என்றும் கூறினார்.

செமிகண்டக்டர் துறைக்கு தற்போது எரிசக்தி பாதுகாப்பு மிகப்பெரிய சவாலாக உள்ளது. செயற்கை நுண்ணறிவின் பயன்பாடு விரிவடைந்து வரும் நிலையில், தரவு மையங்களில் ஆயிரக்கணக்கான உயர் செயல்திறன் கொண்ட செயலிகள் ஒரே நேரத்தில் இயங்க வேண்டியுள்ளது. இதனால் மின்சாரத் தேவை மேலும் அதிகரிக்கும். எனவே, மின்துறையில் முதலீடுகள் அவசியம் என்பதையும் பிரதமர் மோடி அந்த மாநாட்டில் சுட்டிக்காட்டினார்.

செமிகண்டக்டர் துறையில் இந்தியா குறிப்பிடத்தக்க முன்னேற்றத்தை எட்டியுள்ள நிலையில், உலகளாவிய உற்பத்தி மையமாக மாறுவதற்கு திறமையான பணியாளர்கள், ஆராய்ச்சி உள்ளிட்ட துறைகளில் ஒருங்கிணைந்த நடவடிக்கைகள் தொடர்ந்து தேவைப்படும் என்று நிபுணர்கள் தெரிவித்துள்ளனர். இதனை கருத்தில் கொண்டு, செமிகண்டக்டர் உற்பத்தியில் இந்தியா அடுத்த கட்டத்தை நோக்கி நகர்ந்து வருகிறது.

### மிக முக்கிய சவால்கள்

**மின்சாரம்:** செமிகண்டக்டர் ஆலைகள் 24 மணி நேரமும் இயங்க வேண்டும். இதற்கு மிக உயர்ந்த தரத்திலான தடையற்ற மின்சாரம் தேவை.

**தண்ணீர்:** ஒரு பெரிய செமிகண்டக்டர் ஆலையில் நாளொன்றுக்கு 5 கோடி லிட்டர் தண்ணீர் வரை பயன்படுத்தப்படக்கூடும். எனவே, தண்ணீரை மறுசுழற்சி செய்து மீண்டும் பயன்படுத்துவது அவசியமாகிறது.

**மனிதவளம்:** சிப் வடிவமைப்பு, உற்பத்தி மற்றும் பரிசோதனைப் பிரிவுகளில் சுமார் 3 லட்சம் பொறியாளர்கள் பற்றாக்குறை இருப்பதாக தொழில்துறை அமைப்பு தெரிவித்துள்ளது.

**இறக்குமதி சார்பு:** இந்தியா தற்போது பயன்படுத்தும் செமிகண்டக்டர்களில் 90 முதல் 95 சதவீதம் வரை இறக்குமதியைச் சார்ந்துள்ளது.

**விநியோகத் தொடர்:** சிறப்பு ரசாயனங்கள், தொழில்துறை வாயுக்கள், உபகரணங்கள், பேக்கேஜிங், பரிசோதனை உள்ளிட்டவற்றுக்கான உள்நாட்டு விநியோகத் தொடரை உருவாக்க வேண்டியுள்ளது.