தலித் சமூகத்தினரை அவமதித்ததாக ராகுல் மீது வழக்கு

தலித் சமூகத்தினர் குறித்து அவதூறாக கருத்து தெரிவித்ததாகக் கூறி, காங்கிரஸ் கட்சியைச் சேர்ந்த லோக்சபா எதிர்க்கட்சித் தலைவர் ராகுல் மீது உத்தரகண்ட் போலீசார் வழக்குப் பதிவு செய்துள்ளனர்.

உத்தரகண்ட் மாநிலம் நைனிடால் மாவட்டம் ஹல்த்வானியில் உள்ள ராம்லீலா மைதானத்தில், கடந்த 8ம் தேதி காங்கிரஸ் சார்பில் பொதுக்கூட்டம் நடந்தது. இதில், அக்கட்சியின் தேசிய தலைவரும், ராஜ்யசபா எதிர்க்கட்சித் தலைவருமான மல்லிகார்ஜுன கார்கே பங்கேற்றார்.

கூட்டம் முடிந்த பின், ஸ்ரீ ராம் சேனா தர்மார்த்த சேவா நியாஸ் அமைப்பைச் சேர்ந்த சிலர், ராம்லீலா மைதானத்தில் சுத்திகரிப்பு யாகம் நடத்தினர். கார்கே எஸ்.சி., வகுப்பைச் சேர்ந்தவர் என்பதால் இந்த யாகம் நடத்தப்பட்டதாகக் கூறி, காங்கிரஸ் மூத்த தலைவர்கள் பலரும் கண்டனம் தெரிவித்தனர்.

இதற்கு மறுப்பு தெரிவித்த ஸ்ரீ ராம் சேனா தர்மார்த்த சேவா நியாஸ் அமைப்பு, யாகம் கார்கேவுக்கு எதிரானது அல்ல என்றும், மைதானத்தில் குப்பைகள் நிறைந்து காணப்பட்டதால் சுத்திகரிப்பு யாகம் நடத்தப்பட்டதாகவும் விளக்கம் அளித்தது. இந்த விவகாரம் தேசிய அரசியலில் பரபரப்பை ஏற்படுத்தியுள்ளது.

இதுகுறித்து கருத்து தெரிவித்த லோக்சபா எதிர்க்கட்சித் தலைவர் ராகுல், சுத்திகரிப்பு யாகம் என்ற பெயரில் தலித் சமூகத்தைச் சேர்ந்த கார்கேவை வேண்டுமென்றே அவமதித்துள்ளதாகவும், இதற்கு காரணமானவர்கள் மீது வழக்குப் பதிவு செய்து நடவடிக்கை எடுக்க வேண்டும் என்றும் தெரிவித்தார்.

இந்நிலையில், இந்த சம்பவத்தை குறிப்பிடும் போது தலித் சமூகத்தினர் குறித்து அவதூறாக கருத்து தெரிவித்ததாகக் கூறி, ஸ்ரீ ராம் சேனா தர்மார்த்த சேவா நியாஸ் அமைப்பைச் சேர்ந்த வினோத் குமார் ஆர்யா, அமித் குமார் ஆகியோர், ஹல்த்வானி கோட்வாலி போலீஸ் ஸ்டேஷனில் நேற்று ராகுல் மீது புகார் அளித்தனர்.

இதன் அடிப்படையில், ராகுல் மீது வழக்குப் பதிவு செய்த போலீசார், விசாரணையை துவக்கியுள்ளனர்.