திமுகவை சாடிய அமைச்சர் நிர்மல்குமார்

திமுக ஆட்சியில் ஒவ்வொரு மாவட்டத்திலும் குறுநில மன்னர்கள் போல அமைச்சர்கள் செயல்பட்டதாகவும், ஒவ்வொரு இடத்திலும் ஆட்களை நியமித்து வசூல் செய்ததாகவும் அமைச்சர் நிர்மல்குமார் குற்றம் சாட்டியுள்ளார்.

கனிம வளங்கள் முறைகேடாக எடுக்கப்பட்டன

இது குறித்து செய்தியாளர்களிடம் அமைச்சர் நிர்மல்குமார் கூறியதாவது:

திமுக ஆட்சியில் கனிம வளங்கள் முறையான அளவீடு மற்றும் ஜிஎஸ்டி இல்லாமல் எடுத்துச் செல்லப்பட்டன. அமலாக்கத்துறை நடத்திய சோதனைகளின் மூலம் பல்வேறு முறைகேடுகள் வெளிச்சத்துக்கு வந்தன.

தவெக ஆட்சியில் கனிம வளங்களை முறையாக வெட்டி எடுப்பதற்காக புதிய திட்டங்கள் வகுக்கப்பட்டுள்ளன. அரசு அனுமதித்த அளவில் மட்டுமே கனிம வளங்கள் எடுக்கப்படும்.

அபராதம் கட்டாயம்

அபராதம் விதிக்கப்பட்டிருந்தால், அதனை கண்டிப்பாக செலுத்த வேண்டும். இதில் எந்த மாற்றமும் இருக்காது.

திமுக ஆட்சியில் ஒவ்வொரு மாவட்டத்திலும் குறுநில மன்னர்கள் போல அமைச்சர்கள் இருப்பார்கள். ஒவ்வொரு இடத்திலும் ஆட்களை நியமித்து வசூல் செய்வார்கள்.

திமுகவினர் ஆயிரக்கணக்கான கோடி ரூபாய் வசூல் செய்தனர். தற்போது அது போன்ற எதுவும் கிடையாது.

தமிழகத்தில் இருந்து இயற்கை வளங்களை கொள்ளையடித்து, அவற்றை வேறு மாநிலங்களுக்கு விற்க முடியாது.

விஜய் பிரதமராக வேண்டும் என்பதில் சர்ச்சை இல்லை

விஜய் பிரதமராக வேண்டும் என்று கூறுவதில் எந்த சர்ச்சையும் இல்லை. எப்போதும் தமிழகத்தில் இருந்து ஒருவர் வர வேண்டும் என்பது மக்களின் ஆசையாக உள்ளது.

அந்தந்த காலகட்டத்தில் இயற்கை ஒரு விஷயத்தை தானாகவே உருவாக்கும். இதுகுறித்து நாம் விவாதிக்கக்கூடாது.

கூட்டணியில் எந்த முரணும் கிடையாது. உங்களுக்கு சுவாரஸ்யம் வேண்டும் என்பதற்காக தினமும் இதனை எல்லோரிடமும் கேட்டுக்கொண்டு இருக்கிறீர்கள்.

இவ்வாறு அமைச்சர் நிர்மல்குமார் கூறினார்.