செல்போன் பைகளை சில நொடிகளில் திறக்கும் மாணவர்கள்: 750,000 யூரோக்கள் திட்டத்திற்கு சவால்!!

 Haute-Savoie பகுதியில் உள்ள நடுநிலைப் பாடசாலைகளில் மாணவர்கள் வகுப்பு நேரத்தில் செல்போன் பயன்படுத்துவதைத் தடுக்கும் நோக்கில் « Portable en pause » என்ற புதிய திட்டம் அறிமுகப்படுத்தப்பட்டுள்ளது. பாடசாலைக்கு வந்தவுடன் மாணவர்கள் தங்களது செல்போனை ஒரு சிறப்பு பையில் வைக்க வேண்டும். காந்தம் மூலம் அந்தப் பை பூட்டப்பட்டு, தொலைபேசி சிக்னல்களிலிருந்து தனிமைப்படுத்தப்படும். 

வகுப்புகள் முடிந்த பிறகு, குறிப்பிட்ட கருவிகளைப் பயன்படுத்தி அந்தப் பையைத் திறந்து செல்போனை மீண்டும் பெறலாம். இந்தத் திட்டத்திற்காக Haute-Savoie நிர்வாகம் 50,000 பைகளும் 600 திறப்பு நிலையங்களும் வாங்க மொத்தம் 750,000 யூரோக்களை முதலீடு செய்துள்ளது.

இந்தத் திட்டம் மாணவர்களின் செல்போன் பயன்பாட்டைக் குறைப்பதில் ஆரம்பத்தில் நல்ல முடிவுகளைத் தருவதாக அதிகாரிகள் தெரிவித்துள்ளனர். இதே நடைமுறை Ardèche பகுதியில் முன்கூட்டியே சோதிக்கப்பட்டபோது, மூன்று வாரங்களுக்குப் பிறகு இந்தப் பையைப் பயன்படுத்திய மாணவர்களில் சுமார் 15 சதவீதம் பேர் இனி செல்போனை பாடசாலைக்கு எடுத்துச் செல்லவே இல்லை என்று Haute-Savoie நிர்வாகத்தின் துணைத் தலைவர் Jean-Philippe Mas தெரிவித்துள்ளார். இதனால் பாடசாலை நேரத்தில் மாணவர்களின் கவனச்சிதறலைக் குறைக்க இந்த முறை பயனுள்ளதாக இருக்கும் என்று எதிர்பார்க்கப்பட்டது.

ஆனால் திட்டம் தொடங்கிய சில நாட்களிலேயே, சில மாணவர்கள் இந்தப் பாதுகாப்புப் பைகளைத் திறக்கும் வழிகளை சமூக வலைத்தளங்களில் பகிரத் தொடங்கியுள்ளனர். வெளியான சில காணொளிகளில், பையின் காந்தப் பூட்டை ஒரு குறிப்பிட்ட முறையில் பயன்படுத்தி அதை மிக எளிதாகத் திறக்க முடியும் என்று மாணவர்கள் காட்டுகின்றனர். ஒருவர் பேருந்தில் இருக்கையின் கைப்பிடியைப் பயன்படுத்தியும், மற்றொருவர் மேசையைப் பயன்படுத்தியும் பையைத் திறக்க முயற்சிப்பது காணப்படுகிறது. 

TikTok-ல் ஒரு இளைஞர் பையை எவ்வாறு திறப்பது என்பதற்கான « tutorial » ஒன்றையும் வெளியிட்டுள்ளார். இதனால் அதிகாரிகள் எதிர்பார்த்த அளவுக்கு இந்த அமைப்பு நடைமுறையில் பாதுகாப்பானதா என்ற கேள்வி எழுந்துள்ளது.

2018ஆம் ஆண்டு முதல் நடுநிலைப் பாடசாலைகளில் செல்போன் பயன்படுத்துவதற்கு தடை உள்ளது. இருப்பினும், அந்த விதியை நடைமுறையில் கடைப்பிடிக்கச் செய்வது தொடர்ந்து சிரமமாக இருந்து வருகிறது. இந்த கல்வியாண்டின் தொடக்கத்திலிருந்து செல்போன் கட்டுப்பாடு உயர்நிலைப் பாடசாலைகளுக்கும் விரிவுபடுத்தப்பட்டுள்ளது.

Haute-Savoie-யில் 750,000 யூரோக்கள் செலவில் அறிமுகப்படுத்தப்பட்டுள்ள இந்தப் புதிய பைகள், செல்போன் பயன்பாட்டைக் கட்டுப்படுத்தும் முயற்சியாக இருந்தாலும், மாணவர்கள் அவற்றைத் தவிர்க்கும் வழிகளை ஏற்கனவே கண்டுபிடித்திருப்பது இந்தத் திட்டத்தின் செயல்திறன் குறித்து விவாதத்தை ஏற்படுத்தியுள்ளது.