ஊழியர் சேமிப்புக்கு புதிய வரியா? தகவல் கசிவால் பரபரப்பு!!

அரசாங்கத்தின் 2027ஆம் ஆண்டுக்கான பட்ஜெட் தயாரிப்பு தொடர்பாக, ஊழியர்களின் சேமிப்பு நிதி (épargne salariale) மீது புதிய வரி அல்லது சமூகக் கட்டணம் விதிக்கப்படலாம் என்ற தகவல்கள் ஊடகங்களில் வெளியாகியுள்ளன. இந்தத் தகவல் ஒரு உள்துறை பணிக்கோப்பிலிருந்து கசிந்ததாகக் கூறப்படுகிறது. குறிப்பாக, ஆண்டுக்கு 3,000 யூரோக்களுக்கு மேல் உள்ள ஊழியர்களின் பங்கேற்புத் தொகை, ஊக்கத் தொகை அல்லது நிறுவனங்கள் வழங்கும் கூடுதல் பங்களிப்புகளுக்கு கட்டணம் விதிப்பது குறித்து அரசாங்கம் பரிசீலித்ததாகத் தகவல் வெளியானது.

ஆனால் பிரதமர் செபஸ்தியான் லெகோர்னுவின் அலுவலகம், ஊழியர் சேமிப்புக்கு புதிய வரி விதிப்பது அரசாங்கத்தின் முடிவு அல்ல என்று தெளிவுபடுத்தியுள்ளது. கசிந்தது ஒரு “பணிக்கான ஆவணம்” மட்டுமே என்றும், அது அரசாங்கத்தின் அதிகாரப்பூர்வ அறிவிப்பு அல்லது முடிவு அல்ல என்றும் Matignon தெரிவித்துள்ளது. அதற்கு மாறாக, தற்போது பொருளாதார அழுத்தமும் குறைந்த வளர்ச்சியும் நிலவும் சூழலில், ஊழியர்கள் ஏற்கனவே சேமித்து வைத்துள்ள பணத்தை அதிக சுதந்திரத்துடன் பயன்படுத்துவதற்கான வழிகளை பிரதமர் ஆராய்ந்து வருவதாகவும் தெரிவிக்கப்பட்டுள்ளது.

இந்த நோக்கத்துடன், செனட்டர் Olivier Rietmann முன்வைத்த சட்டமூலத்திற்கு அரசாங்கம் ஆதரவு தெரிவிக்கிறது. அந்த முன்மொழிவு, சில நிபந்தனைகளின் கீழ் ஊழியர்கள் தங்களுடைய சேமிப்பிலிருந்து அதிகபட்சம் 5,000 யூரோக்கள் வரை விதிவிலக்காக முன்கூட்டியே பணத்தை எடுத்துக்கொள்ள அனுமதிக்கும் வகையில் அமைந்துள்ளது. இந்தச் சட்டமூலத்தை தேசிய சட்டமன்றத்தில் பரிசீலிப்பதற்கான நேரத்தை ஏற்பாடு செய்யுமாறு பிரதமர், நாடாளுமன்ற விவகாரங்களுக்கான அமைச்சரிடம் கேட்டுள்ளதாக Matignon கூறியுள்ளது.

இதற்கிடையில், உள்துறைப் பணிகள் தொடர்பான தகவல்கள் ஊடகங்களுக்கு கசிந்தது குறித்து Matignon நீதித்துறையை அணுகியுள்ளது. குற்றவியல் நடைமுறைச் சட்டத்தின் 40வது பிரிவின் அடிப்படையில், ப

ரிஸ் குடியரசு வழக்கறிஞரிடம் அதிகாரப்பூர்வ புகார் அனுப்பப்பட்டுள்ளது. இந்த தகவல் கசிவு, தவறான தகவல்களின் அடிப்படையில் நிறுவனங்களோ தனிநபர்களோ முதலீட்டு முடிவுகளை எடுக்கச் செய்து நாட்டின் பொருளாதார நடவடிக்கைகளை பாதிக்கக்கூடும் என பிரதமர் அலுவலகம் கூறியுள்ளது. மேலும், நம்பிக்கைத் துரோகம் அல்லது தொழில்முறை ரகசியத்தை மீறுதல் போன்ற குற்றங்கள் ஏற்பட்டிருக்கலாம் என்றும் Matignon தெரிவித்துள்ளது.