பரிஸில் பல மெட்ரோ, RER நிலையங்கள் இன்று மூடல்!!

தென்கொரிய ஜனாதிபதி லீ ஜே-மியோங் பிரான்சுக்கு அரசுமுறைப் பயணம் மேற்கொண்டுள்ளதை முன்னிட்டு, பாதுகாப்பு நடவடிக்கைகள் காரணமாக பரிஸில் இன்று செப்டம்பர் மாதம் 8 ஆம் திகதி செவ்வாய்க்கிழமை காலை 9 மணி முதல் பல மெட்ரோ மற்றும் RER நிலையங்கள் மூடப்படுகின்றன. Charles de Gaulle–Étoile RER A மற்றும் மெட்ரோ 2, 6 ஆகிய சேவைகளுக்கான நிலையம் மூடப்படும் என RATP அறிவித்துள்ளது. RER A தொடருந்துகள் அங்கு நிற்காமல் தொடர்ந்து செல்லும். காவல்துறை தலைமையகத்தின் அனுமதி கிடைத்த பின்னரே நிலையம் மீண்டும் திறக்கப்படும்.

மேலும், மெட்ரோ 6 சேவை Charles de Gaulle–Étoile மற்றும் Kléber இடையே பாதுகாப்பு காரணங்களால் நிறுத்தப்படும். அதேபோல், மெட்ரோ சேவை 1-இல் Argentine நிலையமும் காலை 9 மணி முதல் மூடப்படும் என தெரிவிக்கப்பட்டுள்ளது. இதனால் இன்று பரிஸில் பயணிக்கும் பொதுமக்கள் தங்களது வழித்தடங்களை முன்கூட்டியே மாற்றிக்கொள்ளுமாறு அறிவுறுத்தப்பட்டுள்ளது.

தென்கொரிய ஜனாதிபதி லீ ஜே-மியோங் செவ்வாய்க்கிழமையும் புதன்கிழமையும் பாரிஸில் அரசுமுறைப் பயணம் மேற்கொள்கிறார். Arc de Triomphe பகுதியில் அவருக்கு சிறப்பு மரியாதை வரவேற்பு அளிக்கப்படவுள்ளது. பின்னர் ஜனாதிபதி இம்மானுவேல் மக்ரோனுடன் Élysée மாளிகையில் பேச்சுவார்த்தை நடத்தவுள்ள அவர், பொருளாதாரக் கூட்டத்திலும் பங்கேற்கிறார். செயற்கை நுண்ணறிவு, குவாண்டம் தொழில்நுட்பம், குறைக்கடத்திகள் உள்ளிட்ட துறைகளில் ஒப்பந்தங்கள் மற்றும் முக்கிய அறிவிப்புகள் வெளியாகும் என எதிர்பார்க்கப்படுகிறது. மேலும், அணுசக்தி மற்றும் பாதுகாப்புத் துறைகளில் இருநாட்டு ஒத்துழைப்பை வலுப்படுத்துவது குறித்தும் பேச்சுவார்த்தைகள் நடைபெறவுள்ளன.