அமைதி முயற்சிக்கு உதவ இந்தியா தயார்: புடினிடம் பிரதமர் மோடி உறுதி

பேச்சுவார்த்தை மற்றும் தூதரக முயற்சிகள் மூலமே மோதல்களுக்கு தீர்வு காணப்பட வேண்டும் என்றும், அமைதி முயற்சிகளுக்கு இந்தியா உதவ தயாராக இருப்பதாகவும் ரஷ்ய அதிபர் புடினிடம் பிரதமர் மோடி வலியுறுத்தியுள்ளார்.

டில்லியில் பிரிக்ஸ் மாநாடு நாளையும் (செப்.,12), நாளை மறுநாளும் நடைபெற உள்ளது. இதில் பங்கேற்பதற்காக ரஷ்ய அதிபர் புடின் 3 நாள் பயணமாக இன்று (செப்.,11) டில்லி வந்தார். விமான நிலையத்தில் அவருக்கு சிறப்பான வரவேற்பு அளிக்கப்பட்டது.

இதனைத் தொடர்ந்து பாரத மண்டபத்தில் பிரதமர் மோடியை அதிபர் புடின் சந்தித்து பேச்சுவார்த்தை நடத்தினார். இந்த சந்திப்பில் வர்த்தகம், முதலீடு, எரிசக்தி ஒத்துழைப்பு உள்ளிட்ட பல்வேறு விவகாரங்கள் குறித்து இரு தலைவர்களும் ஆலோசித்தனர்.

ரஷ்யா சார்பில் மூத்த அதிகாரிகள் பங்கேற்றனர். இந்தியா சார்பில் மத்திய வெளியுறவுத்துறை அமைச்சர் ஜெய்சங்கர், தேசிய பாதுகாப்பு ஆலோசகர் அஜித் தோவல் மற்றும் உயர் அதிகாரிகள் கலந்து கொண்டனர்.

கடந்த ஆண்டு நடைபெற்ற இந்தியா - ரஷ்யா உச்சி மாநாட்டில் பங்கேற்பதற்காக புடின் டில்லி வந்திருந்தார். அதேபோல், கடந்த மாதம் பிஸ்கெக் நகரில் நடைபெற்ற ஷாங்காய் ஒத்துழைப்பு அமைப்பின் மாநாட்டின்போதும் புடினும், பிரதமர் மோடியும் பேச்சுவார்த்தை நடத்தியிருந்தனர்.

### மத்திய வெளியுறவுத்துறை அமைச்சகம் அறிக்கை

இந்த சந்திப்பு தொடர்பாக மத்திய வெளியுறவுத்துறை அமைச்சகம் வெளியிட்ட அறிக்கையில் கூறியிருப்பதாவது:

இரு தலைவர்களும் அரசியல் ரீதியிலான ஒத்துழைப்பு, பொருளாதாரம், பாதுகாப்பு, எரிசக்தி, விண்வெளி மற்றும் மக்களுக்கு இடையிலான உறவுகளில் ஏற்பட்டுள்ள முன்னேற்றங்கள் குறித்து விவாதித்தனர்.

ரஷ்யாவின் சர்வதேச தொழில்துறை கண்காட்சியான 'INNOPROM India' முதல்முறையாக இந்தியாவில் நடைபெறுவதற்கு இரு தலைவர்களும் மகிழ்ச்சி தெரிவித்தனர். தொடர்ந்து, இருவரும் அந்தக் கண்காட்சியை நேரில் பார்வையிட்டனர்.

இந்தியா - ரஷ்யா இடையிலான பல்வேறு துறைகளின் தொடர்புகள் குறித்தும் இரு தலைவர்களும் கருத்துகளைப் பரிமாறிக் கொண்டனர். மேற்காசியா போர், கருங்கடலில் நடைபெறும் தாக்குதல்கள் உள்ளிட்ட சர்வதேச மற்றும் பிராந்திய பிரச்னைகள் குறித்தும், பரஸ்பர நலன் அடிப்படையில் கருத்துப் பரிமாற்றம் நடைபெற்றது.

அப்போது, பேச்சுவார்த்தை மற்றும் தூதரக முயற்சிகள் மூலமாகவே மோதல்களுக்கு தீர்வு காணப்பட வேண்டும் என்று பிரதமர் மோடி வலியுறுத்தினார். அமைதி முயற்சிகளுக்கு இந்தியா உதவ தயாராக இருப்பதாகவும் அவர் தெரிவித்தார்.

இவ்வாறு அந்த அறிக்கையில் தெரிவிக்கப்பட்டுள்ளது.

### புடின் அழைப்பு

ரஷ்யாவில் நடைபெற உள்ள இந்தியா - ரஷ்யா உச்சி மாநாட்டில் பங்கேற்பதற்காக ரஷ்யா வருமாறு பிரதமர் மோடிக்கு அதிபர் புடின் அழைப்பு விடுத்தார். இந்த அழைப்பை பிரதமர் மோடி ஏற்றுக் கொண்டார்.

உச்சி மாநாடு நடைபெறும் தேதி, இரு நாடுகளுக்கும் ஏற்ற தேதியை கருத்தில் கொண்டு முடிவு செய்யப்படும் என்று மத்திய வெளியுறவுத்துறை அமைச்சகம் தெரிவித்துள்ளது.

### திருக்குறள் புத்தகம்

பிரதமர் மோடி பரிசாக வழங்கிய திருக்குறள் புத்தகத்தை நைரா மக்ர்ட்சியன் என்பவர் ரஷ்ய மொழியில் மொழிபெயர்த்துள்ளார். இந்தப் புத்தகத்தை மத்திய செம்மொழித் தமிழ் நிறுவனம் வெளியிட்டுள்ளது.

இதுதொடர்பாக பிரதமர் மோடி வெளியிட்ட அறிக்கையில் கூறியிருப்பதாவது:

“பெரும்புலவர் திருவள்ளுவரின் காலத்தால் அழியாத ஞானத்தை, மொழிகள் மற்றும் எல்லைகளை கடந்து கொண்டு செல்லும் திருக்குறளின் ரஷ்ய மொழிபெயர்ப்பை அதிபர் புடினுக்கு பரிசளித்தேன்” எனத் தெரிவித்துள்ளார்.

### பார்வை

பேச்சுவார்த்தைக்குப் பிறகு, பாரத மண்டபத்தில் நடைபெற்ற INNOPROM கண்காட்சியை இரு தலைவர்களும் நேரில் பார்வையிட்டனர். INNOPROM என்பது வழக்கமாக ரஷ்யாவில் நடைபெறும் சர்வதேச தொழில்துறை மற்றும் வர்த்தக கண்காட்சி ஆகும்.

கண்காட்சியை பார்வையிடுவதற்காக பிரதமர் மோடியும், அதிபர் புடினும் ஒரே காரில் பயணம் செய்தனர்.