மழை

28 வைகாசி 2016 சனி 18:10 | பார்வைகள் : 16129

நகரத்திற்கு வெளியே

செம்பருத்திப் பூக்களுக்கு

பாலூட்டிக்கொண்டிருக்கிறது

வைகறை

நகரத்திற்கு வெளியே

காளான்களின் நிழலில்

பிள்ளையார் எறும்புகள்

அமைதியாக ஊர்ந்து கொண்டிருக்கின்றன

நகரத்திற்கு வெளியே

மஞ்சள் மூக்குப் பறவை

அதன் இசையை

வண்ணங்களால் தீற்றிக்கொண்டிருக்கிறது

நகரத்திற்கு வெளியே

நிர்வாணமாக நீந்தும் சிறுவன்

ஒரு தாமரையோடு

கரையேறுகிறான்

நகரத்திற்கு வெளியே

மேகங்கள்

தாய்வீட்டிற்குப் போய்க்கொண்டிருக்கின்றன

நகரத்திற்கு வெளியே

நிலவு

பூமியில்

பாய்விரித்துப் படுத்துத் தூங்குகிறது

உன் கையகல நிலம் போதும்

நானும்

நிலவோடு

அங்கேயே தூங்கிவிடுவேன்

என் நகரத்திற்கு வெளியே

- பழநிபாரதி

தொடர்ந்து படிக்க