யூத எதிர்ப்பு சர்ச்சையில் Jordan Bardella: ஆதாரங்களை நிராகரிக்கும் RN தலைவர்!!

Jordan Bardella மீது சுமத்தப்பட்டுள்ள யூத எதிர்ப்புக் கருத்துகள் தொடர்பாக வெளியிடப்பட்ட ஆவணங்கள் உண்மையானவை என்பதில் 100 சதவீதம் உறுதியாக இருப்பதாக Mediapart புலனாய்வு ஊடகத்தின் விசாரணைப் பிரிவின் இணைப் பொறுப்பாளர் Fabrice Arfi தெரிவித்துள்ளார். 2013ஆம் ஆண்டில் Jordan Bardella வெளியிட்டதாகக் கூறப்படும் யூத எதிர்ப்பு செய்திகள் தொடர்பான ஆதாரங்களை அந்த ஊடகம் வெளியிட்டுள்ள நிலையில், அவை அறிவியல் ரீதியாகச் சரிபார்க்கப்பட்ட உண்மையான ஆவணங்கள் என அவர் குறிப்பிட்டுள்ளார். எனினும், இந்தச் செய்திகளைத் தாம் எழுதியதில்லை என்றும், Mediapart வெளியிட்டுள்ள ஆதாரங்கள் போலியானவை என்றும் RN கட்சியின் தலைவர் Jordan Bardella தொடர்ந்து மறுத்து வருகிறார்.

இந்த விவகாரம் தொடர்பாக Jordan Bardella மீது அரசியல் அழுத்தம் அதிகரித்துள்ளது. அவர் அந்தச் செய்திகளின் ஆசிரியர் அல்ல என்று மறுப்பது அப்பட்டமான பொய் என நீதித்துறை அமைச்சர் Gérald Darmanin குற்றஞ்சாட்டியுள்ளார். 17 அல்லது 18 வயதில் இருந்தபோது தீவிர வலதுசாரி கருத்துகளைக் கொண்ட Alain Soral-ஐ விரும்பிய ஒருவர் யூத எதிர்ப்புக் கருத்துகளைக் கொண்டிருந்திருக்கலாம் என்றும் அவர் தெரிவித்துள்ளார். மேலும், பிரெஞ்சு மக்களிடம் பொய் கூறுவதை அரசியல் உத்தியாகக் கொண்டிருப்பது, நாட்டின் அரசியல் பொறுப்புகளை ஏற்கும் அவரது தகுதி குறித்து பெரும் சந்தேகத்தை ஏற்படுத்துவதாகவும் Darmanin விமர்சித்துள்ளார்.

இதற்கிடையில், Mediapart வெளியிட்டுள்ள ஆதாரங்கள் திருத்தப்பட்ட திரைப்பிடிப்புகள் என்றும், அவற்றை எளிதில் மாற்றியமைக்க முடியும் என்றும் Jordan Bardella தனது X சமூக வலைத்தளப் பதிவில் தெரிவித்துள்ளார். இந்தக் குற்றச்சாட்டுகளால் RN கட்சிக்குள் அவருக்கான ஆதரவு குறையவில்லை; மாறாக, கட்சி அவருக்குப் பின்னால் அணிதிரண்டுள்ளது. யூத எதிர்ப்பு குற்றச்சாட்டுகள் மீண்டும் கட்சியைச் சூழ்ந்துள்ள நிலையில், எதிர்வரும் அக்டோபர் மாத இறுதியில் நடைபெறவுள்ள கட்சி மாநாட்டில் தலைமைப் பதவிக்கான மறுதேர்தலில் Jordan Bardella மட்டுமே போட்டியிடவுள்ளார்.